台之將亡？

標題果個「台」字係講電視台，唔係另一個「台」，大家明啦！

無線預告：「下星期一八點半黃金時段開始播影(西遊記)」。聽後一則以喜：果套不知所謂嘅「愛」劇終於壽終啦；一則以驚，何解？

如果我冇記錯，呢套(西遊記)好似年前響另一個時段播過，當時我冇睇----講真，呢個故事都唔知睇左幾多次！心諗：仲有咩好睇吖。

不過，有次響飲宴遇倒某師伯，佢話呢套劇啲特技拍得好精彩，佢追緊咁講。

但係，呢套劇既然播過，竟然響黃金時段重播一套唔係自己制作嘅劇，意味啲咩嘢呢？隔離台有段時間都好風光架，套套自己制作嘅劇都叫好叫座，當時攪到無線陣腳大亂；後來隔離台停止自己制作，播晒啲買番嚟嘅片，依家咪....

我都算係無線擁躉，即使播緊嘅節目唔係咁吸引，我最多係開住部電視做其他嘢，從冇諗過轉隔離台！但係近呢一年，真係連我都冇法忍受：「師父？、愛我？、M Club、食平？....」嘩！點頂呀......冇嘅，早抖囉！我叫自己啫：中醫有云，唔好遲過十一點瞓，唔係好傷肝架！

先在此向無線致謝。全靠佢我依家先有覺好瞓！