不應包容當街拉屎

我方便時你踩屎

鏡頭炒作最無恥

京人震怒不可遏

製造東方垃圾池

近日祖家官報評論指出、紫荊人拍攝祖家兒童在城中當街大小便是不文明舉動。而我們的生意局嘅騎呢蘇局長馬上與京人配合、並呼籲紫荊人應該包容、體諒、勿諸多聲氣。呢嗱、騎呢局長嘅講法、等同話祖家成年人讓孩童當街拉屎無罪、紫荊人違反清潔法例罰款一千五百大元有理。就係咁、連胃食局嘅高興民局長都頂佢唔順、企出來反對其「廢腑之言」。咁你話死唔死？

紫荊城清潔法例閘明、讓幼兒當街大小便、在現場的家長或監護人是要負起法律責任、即是會被檢控。然而騎呢局長公然叫紫荊人包容、是否向執法人員暗示、若見到此情形就要佯裝啥也看不見呢？萬一有咁啱得咁橋、遇上左邊祖家孩童當街拉屎、而右邊紫荊人隨地吐痰、執法人員豈不是要包容拉屎者、而檢控吐痰人？喂喂、咁搞法、好易會激發街頭大戰架！難道這就是紫荊城的核心價值呼？

其實紫荊人拍攝有關照片是否有失文明、咱家社會上是自有公論。不過祖家官報在這件事情之上的態度就有本末倒置之嫌。俗語都有話啦、入鄉隨俗吖嘛！雖然祖家向出外旅遊人士派發「旅遊文明指南」單章、但實際上是有人單章接受習慣照舊、繼續讓孩童在街道、火車、地鐵、迪士尼園、海洋公園等公眾地方隨處大小便、那又怎能怪紫荊人嘩然？如果不想有失祖家體面、何不實牙實齒教好人民學會尊重人家的文化和法則？無謂搞到連國格都丟去吖嘛！須知到敗壞人家地方文明、還要惡人先告狀、只會加深彼此之間裂痕、對改善毫無幫助。

作為局長嘅騎呢蘇好應該明察秋毫、而不應叫紫荊人削足就履。所謂包容亦應該有個限度、身為高官點解唔去想辦法令到訪遊客遵守紫荊城法律？假如到你家的訪客樣小孩子在室內四處大小便嘅話、你又是否會再三包容呢？所謂家有家規、國有國法、不同地方有不同法則、果有法而不遵守、又何必立法？計我話、政府應該在遊客區加派人手搞好清潔宣傳和執行檢控、否則紫荊人花了好幾十年心血建立起來的「清潔之城」就會晚節不保。