屎郵包

局長勸你去包容

你對局長氣沖沖

雖然怪事經常有

屎入門來第一宗

呢嗱、唔知邊位街坊咁惡作劇、好寄唔寄、居然先後寄三包屎給騎呢蘇局長嘆、睇來今次巡捕房又有排忙矣！這宗恐怕是本城開埠以來首宗不文奇案矣！唔知呢單嘢是否由於日前騎呢局長呼籲市民包容祖家孩童當街拉屎、而導致今次被人惡搞？如果係咁就認真唔應該。俗語都有話、所謂己所不欲勿施於人吖嘛！有啥唔滿意大可以講出來讓街坊評評道理、無須玩「核凸」啫！如果被人捉去坐花廳、就真係蕃薯跌落風爐、該燴架喇！知冇？

在下忽然記得那位號稱鐵娘子的前副總曾經講過、要她答應放人入紫荊城很容易、但要她再收緊就很困難。現在看來她所言非虛、湧入本城的祖家來客易放難收、而城中配套已經不勝負荷、並激發地兩地人民矛盾之爭。祖家疊水之人炒起咱家樓價、發了地產霸權而苦了基層大眾。另外祖家水客炒起咱家的奶粉、藥物、日用品的價格。對於生意人來說當然是不可多得的機遇、但對於手緊的家庭主婦而言就是雪上加霜。現在連火車地鐵等交通工具也多得祖家來客帶挈、終於擠到連阿媽都叫救命。然而兩地官老爺卻不約而同、將紫荊人與祖家來客的矛盾、賴在為文化差異之上。正當紫荊人有冤無路訴之際、騎呢局長居然向市民呼籲包容祖家人文化、自然會成為箭靶。連日來他老人家被人日插夜又插實在也不好受。本以為他公開澄清並非叫人包容小童當街拉屎、事件就可以告一段落。勢想不到竟然會有人惡搞到送他三包屎咁大整蠱、都可謂始料不及矣！

講開又講、祖家人不斷湧入紫城掃貨、足以反映出祖家出產無法令人安心使用。如果情形繼續惡化下去的話、兩地矛盾勢必加劇。然而紫荊衙門在這方面卻是無能為力、祖家似乎亦無大作為、那叫紫荊人點算好？總之一句阿呢吉帝矣！