相隔四年，草蜢再開演唱會，下月舉行的《BETHREEGRASSHOPPERINCONCERT》開賣即爆，觀眾似乎很期待三子在台上爆肌熱舞，「唔跳會老㗎，我知好多人會覺得唔好意思跳，睇騷要坐定定唔敢郁，但睇草蜢點可以唔郁？」三子你一言我一語的說要帶動現場氣氛，又套餐又FreeHug，務求觀眾睇得開心，「因為太多歌想唱，所以我們特設AB餐任你揀，Rundown上會有唔同，如想足本睇草蜢就要睇足兩場先得。」草蜢還要強調這次不會推出任何錄像產品，那你還有需要考慮麼？記得準時入場。 主持：黃柏高
統籌：林永匡
協力：彭燕燕
攝影：袁東亮
髮型：JackyMa@Headquarters
化妝：PuiPui
場地：紅磡都會海逸酒店
有現場欣賞草蜢演唱會的，都會大讚他們在台上勁歌熱舞夠賣力，說到這次演唱會主題，蔡一智說：「BETHREE意指我們三為一體外，亦有BEFREE的意思，希望觀眾睇完騷會好FREE咁離開，其實我們都有留意社會時事，發覺大家生活都好繃緊，社會積了很多怨氣，希望能透過音樂發放正能量，又或者來睇騷郁動下身體，宣傳Slogan都係『我要跳舞，唔跳會老！』，既然大家工作好忙，無乜時間運動，那就係時候來草蜢運動會郁動吓。」蔡一傑在旁附和說：「係呀，你唔跳仲老呀！」連月來，三子狂操體能胸肌，務求再一次爆衫你睇。
朱祖兒玩斜台
舞台上的草蜢形象華麗，單看演唱會海報已覺吸引，「形象和舞台設計全交創作總監朱祖兒負責，他品味高，又經常周遊列國去拍廣告，所以都好放心交給他，海報上那三頂帽是他在法國搜羅到的ArtPrint，木條製，好有藝術感。」蔡一智大讚朱祖兒的舞台設計好獨特，「他常說草蜢不能做到solo歌手那種四四正正，所以每次都為我們設計傾斜式舞台，話企上去就好有型，但變相就要我們在一個斜台上跳舞跑步，體力消耗好勁。」
蘇志威大呻早年試過在全傾斜式的舞台上奔跑狂跳來保持平衡，「其實真係有難度的，因為演唱會燈光有限，好容易發生意外，加上我們的鞋都有踭，又試過着條裙有成塊布咁大。」蔡一傑笑言他們的裙跟小鳳姐的裙有得揮。
蔡一傑玩freehug
事實上，我覺得在香港睇演唱會是很超值的一回事，而草蜢這次更想盡辦法為觀眾送驚喜，蔡一智說：「有次早餐例會想到AB套餐Rundown，以單雙數去區分，如你想足本睇就要睇兩場先得，蘇老闆仲話不如整套票餐，讓外地觀眾來港睇騷之餘又可以玩兩日，現在還想叫蔡一傑企門口玩freehug。」蔡一傑笑言草蜢是太貪心想唱多些作品。蘇志威笑着說：「你都知紅館過十一點半就要罰錢，但尾段聽到觀眾嗌encore，見興奮又多聲的話，我們又會衝出來，為免會煩到老闆，所以不如分兩日唱，你鍾意可以捧足兩場。」
十月出新碟
說到演唱會主題曲《我要跳舞》旋律由慢到快，甫派台即上熱播榜，蔡一智表示新歌將排在演唱會第一首演出，都係那句「不要遲到！」有人問草蜢幾時出碟，蔡一智表示為免影響質素，決定做完演唱會才慢慢做歌，寧願新碟延遲至十月推出，他說：「現在唱片宣傳期比以前短，好難再有以前張學友《每天愛你多一些》咁經典，先整首演唱會主題曲是讓大家睇下草蜢的新style，加上周杰倫、王菀之都有交歌，你試想想，周杰倫寫首快歌畀草蜢，他的快歌會係點呢？很期待，仲要話佢自己唔得閒編曲，可以任我哋點玩，我覺得件事會好得意，歌詞走唔甩都係林夕和Wyman，還有新進的Wylie，又即管睇下今次造出來的作品會否令大家耳目一新。」草蜢的廣東碟和國語專輯將同步推出。
黃柏高 | 
