黑、白、灰

小朋友開始接觸顏色，或者開始學畫畫，老師會講：太陽係紅色、月亮係黃色、天係藍色、海係綠色.....

我諗梗係咁教啦！如果唔係，何解太陽會係橙紅色呢？你望倒咩？月亮唔係白色咩？何解又變成黃色？天雖然係藍色，但雲係白色，所以正常嚟講，我地望見個天係藍同白色(梗係講好天果陣啦)、至於海嗎？依家響西貢海下睇倒個海可能仲係綠色，其他嗎......

一切都會變，無論係大自然環境、或者係人！

小朋友大左啲，老師會教佢：紅加黃係橙、紅加藍係紫、紅加黑係啡、黑加白係灰...

每遇倒大事大非，人通常得兩面----非黑即白，正邪不兩立！如果講緊果啲係政府政策，政府發言人最叻嘅辯駁係：法例上有好多灰色地帶，我地要慢慢研究吓，睇吓有冇需要修改法例-----跟住？咪不了了之....

大人教細路，梗係教佢地唔好講大話----講大話係唔啱嘅！但係，有冇諗清楚，有邊個人未講過大話？

講大話的例子比比皆是：

當熱戀時，女朋友問男朋友是否淨係愛佢一個？即使唔係，你認為佢位男友會點答佢吖？

拍緊拖果陣，一對戀人食飯，女友明明未飽，但男友問佢飽未？佢會點答？

約左朋友見面，你明明遲左出門；朋友來電催促，你會點答？

你打緊一份工，要告假去見另一份工；如果咁啱趕緊工，老板梗會問你：有咩嘢重要事，非請假不可！你會點答吖？

朋友送你一份生日禮物，果份禮物對你嚟講係完全用唔著嘅；偏偏朋友係都要問你鍾唔鍾意份禮物？你會點答？

其實人的一生，經常都會講大話！最主要講大話嘅目的係令其他人心中好過啲，而唔係想傷害人啫。