娛記作風

筆者甚少睇娛樂版! 由於同事每日放工時, 留低免費報紙, 所以在完成手頭上工作之餘, 以走馬看花方式揭過, 或睇吓標題就算! 咁啱揭到娛樂版指出[星星仔]好掂, 計計埋埋都搵咗成億人民幣(近乎於一億二千萬港元)! 睇到呢度, 筆者覺得而家啲娛樂記者喺唔喺淨喺識得同人計身家, 至於人地點樣發跡就隻字不提?

[星星仔]今日好搵, 相信娛記唔使多講都大把人知! 不過, 今日好搵之前, [星星仔]點樣捱世界? 點樣奮鬥? 點樣把握每一次演出機會時嘅心態? 居然冇一樣作正面介紹! 只識得講錢! 今日報導以錢掛帥, 聽日又報導都喺以錢掛帥! 娛記除咗識得寫人搵到幾多之外, 點解冇其他嘢報導? 豈不是教新一代淨喺識得講錢?

難怪今時今日, 單以香港嚟講咁多新一代認錢唔認人! 睇得多呢種報導, 以為凡喺明星都好搵! 令到某部份人先存有錯誤見解入行, 完全冇稔過捱世界嘅日子有幾長? 自己有冇魄力捱得點? 會唔會搵到好嘅經理人公司? 又唔知經理人公司抽佣犀唔犀利? 又唔知自己幾時會紅? 又唔知自己比人會唔會勤力? 凡此種種,

未有透過當紅嘅人現身說法; 唔知道要等幾耐至等到運到! 仲要早有準備; 仲要遇到好劇本好導演好對手, 咁多樣加埋至有估唔到嘅機會一炮而紅! 紅咗之後, 就更加冇時間休息, 作出日以繼夜夜以繼日疲勞底工作, 至搏到呢億元人民幣! 假使身體健康唔聽使, 贃埋唔喺比醫生, 就喺未必有命享之下, 留晒比家人用!