厚多士
因為強國「阿嬋」同港產「女俠」在港鐵一段充滿粗言穢語的對話,令這一種陪伴港人成長、甚至是早餐必食嘅厚多士(港鐵對話係「阿嬋」認為「女俠」厚多士(好多事)),一時紅爆,成為港人茶餘飯後笑料!
我係斯文人,當然冇咁得閒幫「阿嬋」嘅粗言穢語續句翻譯,我要講嘅係真真正正食得落肚、用方包烘出嚟果啲厚多士。
港式茶餐廳早餐,通常都會有方包、餐包或者係多士跟,即使係方包或者餐包,如果你喜歡嘅,都可以改食多士,大不了咪加多少少錢囉!我成日都講,錢解決得倒嘅就唔係問題啦!
三者比較,我是較喜歡食多士----當然係整得好食果啲:外鬆脆(係鬆加脆---難度好高架)、內軟果種。
多士(譯自英文:toast,又叫烘麪飽)係用多士爐烘過嘅方包,響未有多士爐之前,用火烘亦得。個面有少少燶,外面脆裏面軟。
多士嘅原料係方包,放響多士爐烤到香口,拎出嚟之後喺方包的一邊搽上奶油、牛油、果醬等配料就得。啱啱烘起嘅多士會較為鬆軟好食,凍咗擺耐咗會變硬,風味同口感都會差好多。
有時因為個人嘅喜好有唔同食法,例如將兩塊多士夾起嚟食,甚至會將多士拎嚟炸,變成西多士。
可惜的是,依家響茶餐廳食倒果啲多士都係得兩個字:死硬!
何解?
記唔記得我地細個果陣,阿媽好多時將啲隔夜飯第二日用嚟炒冷飯呀?久而久之,心裡面有一個道理:炒飯係要用隔夜飯嘅!
近幾年我多次睇電視節目介紹炒飯時,名廚都一再強調不要用隔夜飯整。何解響茶餐廳食倒嘅多士,有時好「正」、有時好差呢?我估佢地通常係用隔左夜嘅方包整,所以得個硬字;但係咁啱你落「柯打」果陣,冇晒隔夜麵包,用左新鮮嘅整,咪完全唔同食法囉!
香港茶餐廳最早開始有多士時,我懷疑係因為餐廳早一日入左嘅方包用唔晒,將佢烘左俾客人食(無謂嘥),所以演變成多士呢樣嘢。當然,外個人一早有食多士(toast)做早餐呢個集慣;但係,即使係隔夜麵包,要做到如新鮮麵包一樣係有辦法嘅。
多士加上其他嘢,個名亦會變:
茶餐廳有:
厚多士呢樣嘢,響台灣小食中更加發揚光大,在厚厚的多士上,塗上很多不知名目的醬料,但一般偏甜,唔太啱我口味!台灣珍珠奶茶舖有(叫「吐司」英文toast音譯):
- 椰香吐司
- 草莓吐司
- 芝麻醬吐司
- 藍莓吐司
- 薄荷吐士
我都係喜歡原始果種,響烘得外鬆脆、內軟的多士上塗牛油口味。可惜,現時的茶餐廳,即使間中有幸遇倒一件烘得唔錯嘅多士,卻被一粒雪到硬晒嘅牛油破壞左!
我雖然鐘意食油醬多士,但台式的厚多士我又唔係十分鐘意,因為落得太多花生醬。
我鍾意食油多,或者花生醬多士(最好係粗粒花生醬)。台灣吐司偶然食吓就好,因為太厚。
真正有質素嘅多士難求,可能真係要「自作自受」先得!
您講起多士,引到我想食,即刻去烘塊多士食吓先!
我用隔夜方飽,因為可烤到脆卜卜,我在美國時才會食,女婿話是餅干不是多士!我唔食醬,用雞蛋加火腿。