不能中立

離開左職場快兩年啦！以前響公司每日睇十幾份報紙(包括幾份免費嘅)，依家雖然冇免費報紙睇，我每日都一定買一份嚟陪我食早餐。

可能你會話：街外大把免費報紙攞；要不，上網睇慳番啦！

唔好意思，我住呢度方圓幾條街都冇免費報紙，要攞就要行上火車站！我邊有咁神心吖---加上比較多嘢睇果份「頭條」要入左閘先有得攞！咁咪貴過買一份！

至於網上睇，我覺得好費神；兼且要左搵右搵，我祇會因為想搵某一個議題而上網摷資料。

言歸正傳，如果你做個調查問市民：你支持左邊、定係右邊(唔駛劃公仔劃出腸掛)？

答案得三個：第一. 我支持左邊；第二. 我支持右邊；第三. 我兩邊都唔幫，我中立嘅。

支持左或右，好簡單易明，但係中立一詞，個人認為冇一個人可以絕對中立嘅。等如我早幾日講：冇一個人可以唔講大話一樣。

何解？事實上，得咩？中國人講得好：針唔拮到肉就唔知痛。冇事影響倒自己嘅，當然可以不聞不問；當有嘢殺到埋身果陣，就唔同講法啦！

鬼唔知垃圾站、焚化爐、堆田區、骨灰盦呢啲嘢，都係冇佢唔得！但係如果政府建議響你住果區興建，你仲會唔會大聲講：我中立，冇意見吖？

相反，如果政府建議興建公園、單車徑...可能你又會大聲疾呼：點解我果區冇？

依家每次立法會有重大議題討論，必定有幾位「議員」經常攪攪震，無非想早啲收工啫；他們所作所為相信不會得到大部份市民認同；可是，每到選舉之年，佢地又一樣獲選入議會。有分析認為選佢地嘅人：

一. 認為議會入面一定要有反對聲音。啱嘅，如果唔係「係又反、唔係又反」的話；

二. 依家啲年青人較以前反叛，果幾位捉倒年青人反叛性格，所以有一定年青人支持；

三. 依家政府真係弱過藥煲，好多人鍾意睇議會久唔久有呢啲嘢，作為茶餘飯後笑料。咁佢地咪可以咩嘢都唔做---鍾意就響會議廳坐一陣、唔鍾意嘅搵啲嘢攪吓搏俾人趕出議會、就算走唔倒，起馬都收倒宣傳之效吖！(傳媒亦樂得有嘢好寫)

身為土生土長的香港人，亦曾以公務員為終身職業的我，當然唔希望政府處於弱勢；但香港在植民地管治後期，聰明的英國人在撤出香港管治前的十幾年，經已諗定一個所謂代議政制(即係區議會)。何解我話佢地聰明？因為佢地最初推行代議政制嘅時候，係有委任議員嘅----因為英政府好清楚委任議員有佢嘅存在價值；如果全部議員直選，政府就會失控！

隨著九七來臨，好多人以為好民主果位「肥？」就成日講：香港應該有民主，委任制唔應該永遠存在。(不過，香港一日係仲係英國管治，你諗都唔好諗)

聽落真係好似好為香港人諗咁。你問吓佢：「何解響香港仲係植民地年代唔推行全部民選嘅議會？」(因為佢地好清楚行唔通囉)

所以，每逢大事大非，香港人點會冇立場？點會中立？無論你心裡面諗咩嘢，都會偏向某一面！