柴鋪的故事。
１９３４ 年，煤氣鼓爆炸，大火狂燒兩三小時，由於一幅小矮牆，加上東北風，晉成街沒有人死，反而高高在上的加倫臺，死了數十人。（圖 １。三位古裝少女，背後小矮牆後面，是前煤氣鼓）。
１９４７ 年，我家搬入晉成街 １７ 號二樓，當時全街十八座樓，由同一業主擁有，每月都有一位 游先生上門收租。
因為剛剛打完仗，全港人口只有５０萬，晉成街也冷清清，只有四間鋪頭，一號柴舖，１３號 鐵舖，１６號大華罐頭鋪， ５號士多舖。
回顧晉成街四大名店，最好生意的是柴舖，開門七件事：柴米油鹽醬醋茶，柴行第一，要吃飯，怎可冇柴，。
大華罐頭鋪和鐵舖，尚未展開拳腳，５號士多舖最慘，做小孩子零食，賺極有限，很快又面臨勁爭，3號地下另一間士多舖開業了。
誰料好景不常，不到五年，火水爐出現，燒柴極速被淘汰，柴舖變成歷史。
為了紀念這段歷史，我要提提，一位老公公，他是一號柴舖老闆之父，他年約 六七十，高高瘦瘦，白髮稀疏，我家第一次幫襯，他用擔挑把柴送到二樓騎樓，並主動用我家的大秤，當面證明斤兩十足。以後，大家信任，不用再秤。
有一次，我在騎樓破柴，老公公很認真地對我說：「細路，破柴應在廚房，不要在騎樓，騎樓下面冇嘢托實，震裂石屎，會蹋樓。」
我改在大門口破柴，但又阻住鄰居，幸好火水爐出現，方便多了。
很多謝老公公的教訓，我一直有留意我家騎樓，看看有沒有裂縫，到七十年代後期，真的有石屎剝落，也有裂縫， 老人之言，不可不聽也。 （圖２，騎樓）
最後要提三句與柴有關的廣東口語。
１。扭紋柴。
２。偷 柴。
３。拉 柴。
人的一生在此， 你聽過嗎 ？
-------------------------------------------------------------------------------
煤氣鼓前，右下是晉成街。煤氣鼓左邊是加倫臺。 圖偏取自
西環的黃金歲月
（圖 １）
（圖 ２）
火水爐
秤
劈柴刀
柴
我的另一 blog
🤩😍😊好開心睇到呢個網誌，不過遲左咁多年先睇到，覺得有点可惜，唔知仲有無人回應🤔
印象中街口係經常都有個大盤洗玻璃药瓶，行前幾步街口電燈柱掛左老鼠箱😬, 好似會有工友去夾走🙈麻石樓梯係叫石級，如果而家仲存在就應該保育，引用佐證石塘產物👍，雖然無中環媒氣燈個條石級咁四正。返學放學必經山道，好多野食架，其中一檔賣糯米飯，有葱有花生又有豬油炸，香噴噴，一直記住，可惜至今食唔返啦😋😥
仲有，要記低細時都聽過街上隅然會有人叫喊沙骝豬😉😁
PFn 孖1 兄，相信你已安全退休，展開人生另一頁，祝你從此一帆風順，萬事如意。
萬兄，KC, tt.
你哋好。明天係母親節，祝大家母親節快樂大家身體健康，事事順利
晉成街一號地下家人
pfn兄，QQ 是一個才女，你看她的文章便知，我信你們都是同時代，潮商學生，可能認識也未定，你留言給她吧
．
萬兄 . KC . tt 大家好 :
剛剛睇到原來QQ有讀過潮商學校,我係1973年入讀,唔知見過QQ未,我記得潮商對面係香港大學,旁邊有個水務局,再沿斜坡上有個網球埸,個埸平時好少人打網球,所以好多時俾人佔用來踢波.[晉成街]好多街坊逄假日就會係到踢波.我記得我當時班房近上香港大學樓梯,而我又坐近樓梯嘅窗邊,所以我d波友如果上去踢波,當上樓梯經過我嘅班房時,就會叫出暗語通知,我當時人在班房,心在球場.咁[心散],所以讀書不成,浪費呀媽d錢,宜加諗番真係唔[生性].
晉成街一號地下家人祝萬兄及家人 生活愉快.身體健康
街童歲月
以往晋成街是一條掘頭巷, 小朋友可以在街上玩, 例如打波子呀, 拍公仔紙呀, 男仔可以玩跳OVER, 用床板做波枱打乒乓波, 女仔可以跳橡根繩, 抓子, 又可以男男女女玩捉迷藏, 跳飛機, 拋手巾等等集體遊戲, 很多群體生活ｏ
也可以和大人捉象棋, 談天說地, 聽大人吹水是一大娛樂, 也學了不少知識, 在街上又學到好多街頭智慧, 見一事, 長一智也ｏ
我也是隨着大隊一齊去學踏單車, D人把我放上單車. 在斜路向下一推, 就話之你死矣ｏ第一次梗係膝頭損晒啦！不過一嘢就學識平衡了, 快過打針也, 唔信你試吓啦, 從此我就可以扶住D小師妹教踏單車了, 又可以收好多靚師妹了, 哈哈！（吹吓水之馬ｏ）
以前玩的玩具, 好多時都是自製的, 例如用竹可收以做水鎗, 迫 (百) 筒, 用雪條棍又可以做很多模型, 玩金絲貓呀, 養蠶虫呀, 都不愁寂寞也ｏ
又可以玩穿膠花, 黏信封, 賺外快也ｏ用一個荷蘭水蓋也可以用一條繩做個風火輪互片！（界斷人條繩也ｏ
以前的小朋友, 比較多群體生活, 很容易就學識與人相處, 也是街頭教育, 而家冇左呢一瓣教育了ｏ
奉上舊作, 端午節分享！
QQ，你的童年不壞，你在潮商讀時，老師讚你靚女。
你每天都經過晉成街，有沒有留意有男孩子眼金金望你呀。
晉成街後期的男孩子，比較早熟喎！
你近來寫少了，很忙吧。
kc 說：『沙騮豬先生發育成了一個巨人！」。
我越想越驚，好在他不記仇，有一次，見我翻車，他急步走來扶起我架綿羊。
萬大兄又再寫故事,要多d上來至得.看見哥哥們訴說童年往事,qq是個沒童年的人,只有羨慕的份兒.
煤氣鼓不是在士美菲路嗎?
我二兄大我約六年，廣仔先生和沙騮豬先生初期和小弟差不多高，忽然間沙騮豬先生發育成了一個巨人！
成了我班小朋友的領袖！
所以二兄能弄斷沙騮豬先生的腳，我也難理解！
晉成街的小朋友，一代還一代，我二兄的小時的小朋友是牛仔，亞輝果班！
我的小朋友隨了以上兩位，還有鐵舖的周世顕！強仔等等！
再細D果班根本已經沒有一齊玩過了！
所以tt和誰玩，我也沒有印象！
反而一號旁邊曾有一人，去學整餅，返來在巷仔做餅！
居然請我們街童吃免費試食！
後來好似盲咗！
巷仔後來又做飛髮，師傅成日用風筒辣D小朋友！很可惡！
不過好多公仔書睇！
小女子好有創意
唔好食咁多,好濟
萬兄 . KC . tt 大家好 :
我六零出世，你講d街上寶藏搵錢，衹有等大華罐頭每年一次的
豆豉鯪魚罐頭出貨日，佢哋需要街坊幫手係豆豉鯪魚罐頭做貼標
誌，這天成條街尾都係罐頭，場面都好震撼，吾知你哋試過未，
大約做到下午3點收工然後出糧。
其次就是鬼節燒街衣，係街童搵錢大日子，小朋友拾錢嘅方法
各式各樣，有單獨，有合夥的，通常我哋會用合夥，因為大家執
到錢嘅機會大增唔駛食白果，通常多數係5仙，但積少可以成
多，我記得有幾戶住2樓人家，佢哋會係家裡剎錢，有無你哋
份，講開執錢，今日係大家樂等梗老婆時，有位少年剛剛係 [
7.11 ]買完嘢行去對面 [ 大家樂 ]排隊買早餐，突然有位女士
拍他膊頭，告訴他跌咗錢，跟著他回頭一望然後回一個字，哦
然後繼續做低頭一族，我跟著位女士指示方向一睇，一個10圓硬
幣，當時我心想，邊個做你父母真係要教下佢，未識搵錢先學敗
錢，搵錢返呢養你，你估真係唔駛做。最後我執起個硬幣攞去買
旗！
KC兄我從文章中看到，估你係一個好享受美食帶俾你滿足嘅人。
tt講嘅你常會去潮州大牌檔魚旦粉！至愛魚片頭加腩汁麵！唔該
麥牙糖！街口成日食。
顏姐的白果粥同油條真美味！我讀加倫臺南光學校時返學嘅早餐
姑婆的牛雜麵，只買二毛！ 我有少少印象18號地下。
添記雲呑麵三毛有交易！睇住我大好彩無學壞，自己覺得。
慶叔的油尖多一毛有交易！二哥成日請我食，碳燒油尖多，返而
好少食tt講嘅燴魷魚，可能價錢貴好多，食吾起。
還有我記得，有些日子有一班做到會大廚，會係8 號地下做到
會，我哋梗係無得食喇，但成晚淨係睇同聞已經好滿足。
萬兄真係觀察入微，估到我做紀律部隊[勁]，小弟做[72家房客]
成日講嘅金句中的職業。 [ 期待二哥斷腳的經歷 ]
晉成街一號地下家人祝黃兄及家人 生活愉快.身體健康 預祝端午節快樂
我最鐘意聽二哥講故仔，以前在騎樓開帆布床坐在上面，等二哥講，耳邊現在還響著二哥叫返屋企食飯。美好歳月。
乜有斷腳事件咩？我完全冇印象，應該好大鑊之事噃！ 應該是發生在沙騮豬先生未發育之前！ 在我印象中，佢很快長得神高神大，成個巨人咁欵！ 冇乜人夠膽郁佢噃！ 果陣同我玩班小朋友最高大係佢！成個魯智深咁欵！
梁 兄，
1號2樓薛仁貴,他是工會愛國份子，和我父母很熟，他是長輩，我叫他薛先生，有一次我在大排檔食麵，他叫我一聲二哥，並熱情地和我付款，很多謝他。
當年街上，男孩只和男孩子玩，除了偷偷看女孩子外，是不睬女孩子的，加上我又不早熟，故不知他有個女，和我是校友。
梁 兄，你現在才退休，希望你不是警察，因我準備詳細寫街童及黑社會對兒童的影響，並交代你二兄斷腳事件，如有過火，實比你捉到。
我做街童的年代是六零之後了，小弟當年才十多歲，日日在街中渡過，除了上學，大部份時間都落街玩！
街上大把寶藏，小朋友拾倒銅鐵也識攞去賣！
又可攞D罇罐之類賣錢或換麥牙糖！
又可去海邊釣魚，掘沙蟲，去街巿賣搵錢！ 做膠花，整信封也可賺錢！
早上顏姐婆的白果粥同油條真美味！
樓下的姑婆也整平價的牛雜麵，只買二毛！
街口添記雲呑麵三毛有交易！
以往的日子真好！
慶叔的油尖多一毛有交易！
KC腦海中我兩位哥哥似...魯智深的二哥，似吳用的大哥，一文一武！
我兩位哥哥大家性格好唔同，KC形容得好恰當，雖然二哥樣子有些嚴肅
，但我記憶中佢未對我動粗過.可能佢知自己天生神力，我d豆丁典可以捱
到佢d神力，用口駡幾句算數，我童年時見到他好驚慌的，我要遠離二哥
視線，俾佢見到.三個字[返屋企].大哥唔駛講駡都唔會，可能佢係當舖工
作，一年先會係過新年才會返屋企住個幾日，所以睇唔到聽唔到我d頑皮
嘢.[佢唔駛咁激氣]KC講得啱.街中黑道人物也很少搞D小朋友！我係街尾
玩捉迷藏.時常都會藏於係15號同16號之間嘅樓梯，係1樓至2樓轉角位好
多時見到有人係到追龍，好好笑，佢有佢食，我有我玩捉迷藏.真正和睦
相處！鐵鋪我記得有一年係過新年.鐵鋪我無記錯有對孖女.佢哋好少落嚟
玩，當時我係門口玩梗爆竹，佢哋可能少接觸，覺得好得意，正當佢哋行
埋嚟時我又正在點梗爆竹拋出去剛剛跌落其中一個腳的位置.爆爛咗佢對
過年新襪，跟著佢大喊一聲，當時我成個呆若木雞，母親即時行去鐵舖向
大哥成連續講幾句唔好意思.大哥成回應，好少嘢唶，換對新襪無事.母親
先至放心.跟著就係開年
！KC講當年一班小朋友，而家已是七老八十
了！[我都出年退休了！].話咁快
二家姐回憶起，1號2樓有家人，佢個名叫[薛仁貴]，佢有個女係漢華讀
書，校服記憶中有扣著毛澤東銅像，唔知係唔係校章呢?是否萬兄校友?
萬兄廖創興三樓有得沖涼咁正
晉成街一號地下家人 祝各街坊 身體健康 保重
當年做街童，打打乒乓波，跳over,打波子，拍公仔紙！捉象棋，日子就係咁過！
零食也不少，麥牙糖，豆腐花，豬腸粉，鹵味，魚蛋粉••••••••
大大的夾餅，內有花生同糖，斗零一角，吃得飽飽！
晉成街的街坊真不錯，現在的大廈，除了點頭問好外，沒有咁親切了。
沙騮豬先生在kc腦海中就似魯智深的人物，而廣仔先生就似吳用，一文一武！
當年一班街童就日日玩！ 似乎都很和睦！
街中黑道人物也很少搞D小朋友！
鐵鋪幾兄弟也十分好人！
很多年後，我去換身份證，同我做的官，竟是我叫佢周世顕的顕哥！ 聽講佢細佬也讀書不錯！
當年我家樓下楊先生的公子做了醫生！
當年一班小朋友，而家已是七老八十了！
抽波難倒我
掟仙掟盤，拍公仔紙是男仔玩，二哥放有一堆細佬那張相，看pfn認識嗎？魚蛋麵大排檔，二哥食唔少，乒乓波水••••哈哈，二哥••••
黄兄: 早晨 KC兄如果係晉成街相傳嘅棋王,我寄記係18號地下好多時都有兩大高手係都楚河漌界.寸步不讓，我都有時係到偷師.可能個時KC就係我隔離。擦身而過。講到我嘅乒乓波球技術，出吾到大海，門口狗得搭笑. 下次再談 保重
Mattock兄，
你住屈地街，你對晉成街沒有印象。
但我對你屈地街有很好的回憶，我曾去屈地街電車站執電車票，找靚號碼，放石磚在電車軌，看會不會爛。
我曾在屈地街總站小沙灘游水，潛水執磁公仔，海傍掃黃豆，又去廖創興三樓沖涼，很多苦力也去沖。
年齡不同，和你緣慳一面，真可惜。
正是－
你我相差過十年，
如煙往事說從前。
網上相逢應一笑，
說是無緣卻有緣。
萬大英雄早晨，謝謝您的甜蜜回憶，小弟住屈地街十年，對晉成街毫無印象，謝謝您的分享！
pfn兄，kc 是晉成街棋王，你是兵乓波王應冇錯了.
KC你好:
好多謝你講述我二哥的童年往事,其實我同二哥年齡相差幾遠,所以對
二哥童年嘅生活真係認識不多.希望KC可以講多些關於哥哥的童年往
事,讓我和較幼的姊妹加深對二哥童年時如何渡過.
至前我對晉成街地標樓梯回憶後.我昨晚在夢中又想起在晉成街裡每
一各落留過的足跡.
先由門牌細開始.自己屋企門口,乒乓波.我會係家裡攞兩張床板當乒乓
波枱,枱腳要借用(2)號鐵閘舖大哥成用來承載鐵閘的A字鐵架來承載
床板當乒乓波枱面,中間用木條當乒乓網.大家都知道條街好多人來人
往,有時d街坊見到又一齊玩,攪到好多時要排成10幾分鐘先到自己玩.
但無所謂喇,最緊要開心.唔知大家有無食過我哋對面大排檔嘅潮州魚
旦麵. 講個秘密大家知,我哋有時打到個乒乓波凹陷時.最快將它環原
方法係用熱水滾一下便會回復原狀,大家有幫襯佢食麵時係吾係好味
咗呢.
(3)號地下係做回收藥水玻璃樽,好多時都會係門口工作所以好少係(3)
號門口玩.佢哋清洗玻璃樽時,將剩餘的藥水倒落坑渠的時侯成日都聞
都d藥味.都幾爛頂,不過人家要搵食無計.清洗完交俾診所再用,好環
保.(4)號地下就唔同晒喇.因為大華罐頭舖唔係成日開工.好少時間係
到閘鐵片做罐頭罐.所以睇番上面第2張相片你咃會睇到好多時用鐵
鏈鎖著的.我咃會玩1,2,3,紅綠燈,拍公仔紙,[掟仙/掟盤我諗大家都唔
知係嘜嘢呢,有機會介紹俾大家認識].(5)號地下士多舖係俾大人娛樂
嘅地方,成日有張麻雀枱侍候抽水.我哋唔敢騷擾佢哋,如果因我哋玩
攪到d大人食炸胡懇定俾佢駡死. 所以無得係到玩.其次係二哥有時係
到打牌的走為上策.(6)號地下要上幾級樓梯先上到去,因為佢近木廠好
多木屑同好多積水,有陰暗,勁多蚊.所以好少係到玩.最後就講下1至6
號後巷,可以係(1號)入(6號)出,調轉行又得.係我童年時覺得好神秘地
方,所以一度中秋節,便會組織探險隊每人一個燈籠入去探險.唔知大
家試過未.講個秘密大家知但唔好嬲.當有d唔係我哋玩開朋友仔入去
探險時,我即刻走入天井攞條水喉射去後巷做成好似落雨咁. 班探險
小朋友因為後巷漆黑一片個個都以為突然間落驟雨,好狼狽咁走得快
好世界.希望你哋無中過招,咁唔好彩有你份,我係到同大家講句Sorry
囉.
晉成街一號地下家人祝各街坊身體健康 [ 預祝大家端午節快樂 ]
下次d字體要執執.我自己都睇到眼花
沙騮豬;是我細時差不多同齡的玩伴！很有體育細胞！
我們用床板做波枱打乒乓波，佢好快可以打嬴通街，又可以用左手讓我們！
很快長得神高神大！
後來去做啤工，只見佢可以跳起用體重來壓！
我們小朋友全部做不來！ 只有羨慕的份兒！
只有大家去做膠花！
以前慶叔用兩個鐵絲網夾麵包烤多士，烤尤魚，好香，我在旁看，聞，冇錢幫襯，看一回又去跳橡筋繩，玩麻鷹捉雞仔，一二三紅綠燈，多美好的生活，玩到差不多，就聽見二哥或工人叫番屋企食飯，如果時光可以倒流多好。
黄兄: 原來你係我哋跳樓梯嘅師兄，失敬。慶叔係18號旁邊木屋主人。就是tt同18樓姓楊朋友相片中，左邊後面近樓梯的方向佢家中養咗隻大狼狗睇門口的，還有做些街坊生意，最出名係絲襪奶茶同碳燒多士，想起都漏口水。小弟係山道小學畢業後，混混噩噩幾年後加入社會大學捱世界了。 晉成街一號地下家人祝黃兄及家人 生活愉快.身體健康
梁兄，慶叔是否在７號魚蛋佬旁開咖啡檔那位。我看著山道小學由空地建成，好學校，你幸運了。有冇人讀漢華？
你跳大石級，一跳八級，相當利害，但我也喜歡跳，由最頂逐三級三級跳，豈料越跳越快，四，五六級，結果到最後一跳，破我自己紀錄，也不知多少級，好像騰雲架霧，滾地葫蘆。膝頭流蚊飯。
黃兄tt早晨:
以前歲月多美好,講得無錯
睡衣是我們的禮服----隨街走。我嘅童年係街頭玩到
街尾.可能我住地下,一出門口便是街,其次係我當時讀山道小學上午班一放學回家
得自己一個,因當時家貧哥哥姐姐好早出來工作幫補家計,而細妹讀下午校所以好
似無皇管自出自入,宜加諗起都覺得好過分.如果要我選晉成街地標條樓梯應該當
之無愧.條樓梯除咗方便人上落外,我哋會玩包剪揼鬥快上到頂,又會係樓梯鬥跳得
多級落地下.我無寄錯當時可以跳8級(勁吾勁).兩旁由麻石建造嘅梯邊係我至愛,當
我蓄夠錢便會買坦克車模型玩,因為梯兩邊有條大約1呎濶度及斜度.可以睇吓間坦
克車上度幾高.跟著講兩旁梯邊距離大約有12呎濶,兩旁樓梯柱又有好像龍門柱.成
個足球龍門咁,我哋d西瓜波足球技術就是這樣練成.最後還組成一隊足球隊名叫(小
白獅)不過係嚟度真係要講聲好抱歉,因好多時我哋踢波影響到d街坊由其係呀慶
叔,因為慶叔木屋係樓梯旁邊我哋d技術成日打飛機高出跌落慶叔屋頂要麻煩慶叔
攞枝竹幫我哋執波真係要講句麻煩晒慶叔,呢d便是(人情味).最後我的至愛.夏天時
玩到周身慶(合合)時,我和班街童各自搵一邊樓梯邊瞓.總共有6條,每人各佔一條,個
種清涼感覺一個字(爽) . 二家姐更正.原來我家人搬入晉成街一號地下時,是住係閣樓.一家10口諗起都
晉成街一號地下家人祝黃兄及家人 生活愉快.身體健康
多麼珍貴的往事回憶。
以前歲月多美好，睡衣是我們的禮服，校服之後就是睡衣，冇多餘的衣服，人長高了依然穿著，隨街走。
Pfn兄，您好，另外高那女孩住後面士多三樓，名字忘記了，她放學有空下來玩，經常在家樓榜，學仙姐唱帝女筏，跌跌撞撞行下來唱：”名花不配被俗世汚••••••”是迎鳯一段，我們很開心的玩，可惜當時我不會唱也有睇過帝女花，只能看她表演，請告訴貴姐，我家中名叫亞甜。
梁兄，你說「父親為人好重義氣好多d錢用呢幫朋友而又吾會問人收番理財不善下最後才搬到。。。。。」
當你看到我寫你二兄時，你便知到你父母，很明白事理，更有寬恕心。
圖中的古裝少女，穿花布的是我妹妹，站在旁的是 １８ 號三樓姓楊，她倆不見多年，在 calgary 相遇， 相擁而哭，仿同隔世。
黃兄你好:
首先多謝你對一號地下柴舖的往事描寫得好有親切.睇你同
世伯所寫嘅文章真係令我獲益良多及了解晉成街的人和物
都加深一份認識.再文章中題及的老伯應該係我外公,我聽
母親講過當時父親係東邊街做買柴批發生意所以當時會送
些柴俾外公買幫補家計.所以當時我家住係晉成街另一單位
(要問番長輩正實下先),後來好似文章題到燒柴煮食開始
被火水爐代替生意一落千丈及父親為人好重義氣好多d錢用
呢幫朋友而又吾會問人收番理財不善下最後才搬到一號地
下頭房同外公居住到清拆,而外公一家搬遷到西環大樓而我
家人搬去青衣居住.講開我外公佢係我家人眼中一個好和藹
可親的外公,我記得他年事已高時行動不便每晚有時間我哋
會幫外公攞盆水俾外公洗面洗腳然後攞去倒埋這時外公會
給我哋一個好親切的微笑.永遠懷念他.黃兄在相中的女孩
我家姐問是否你的親人,自從知道有呢個網誌後我已推薦給
家人及舊街坊觀看.黃兄d昔日相片和文章都帶給我們對晉
成街美好回憶.清拆後已經無添燦消息了但吾緊要有呢個網
誌我感覺到大家近在咫尺.有機會我都想講番當年我做街童
的往事.
晉成街一號地下家人祝黃兄及家人 生活愉快.身體健康
,
原來晉成街對我們是快樂的回憶，親切又無憂無慮。以前的人純真，男仔同男仔玩，女仔同女仔玩。
tt.你和楊小妹他鄉重遇，相擁而哭，很感人啊。
晋成街快樂的回憶！