狗公彭某

2014/06/01 07:28:44 網誌分類: 影視
01 Jun

近日全城鬧得熱烘烘的話題----一名已婚導演與多名嫩女有親蜜關係,視老婆如無物,偏偏佢老婆都係有頭有面嘅人(不過我都唔知佢係咩嘢樣)!

當然,男士有第二個、第三個唔一定係個男人錯。我地唔係當事人,冇可能知道實際情況;但係,傳媒報導得出嚟,如果完全唔係事實,當事人冇可能唔出嚟澄清,名譽尤關喎!

呢啲所作所為,通常一通左天就惹來市民/網民大鬧----以佢嚟講,最簡單杯葛佢嘅方法咪唔睇佢拍嘅戲囉!不過,我呢廿年都冇入戲院睇戲,所以對我嚟講用唔著;反而電視藝員我唔like可以關機、轉台唔睇佢!

最近另一類似熱爆話題咪係一名報導指係男人都啱嘅電視女藝員與另一男藝員單嘢囉。女藝員因為泊倒個高層碼頭,早輪差不多套套劇集、資訊節目都俾佢做主角/主持;可惜,爛泥始終扶唔上壁----頭一套可能角色啱佢,都覺得佢OK嘅,但係唔得就係唔得(話之佢有高層撐),其後套套有佢份演嘅戲、我都頂唔順要轉台:連我呢個無線擁躉都支持佢唔住!

當然,演技需要時間磨練出嚟,弊就弊在佢啲男女關係亂過亂世佳人!難道佢想走三級電影路線,先從現實生活做起?弊在佢要樣冇樣、要身材冇身材呢!咦,呢句對白係「步步驚情」男配角對女主角講架喎!

聽講無線諗住可以食住呢個熱門話題,拿拿林搵男女主角拍劇添!如此一來,又要轉台咯。

講開電視節目,又講吓「西遊記」幾咁差吖!早幾日有一集講唐僧拖住隻白馬,俾褐子精同班手下捉左,鏡頭仲影住蝎子精個手下拖左隻白馬出去;誰料轉吓頭,影住唐僧三個徒弟同隻白馬一齊去搵唐僧----咩隻白馬識得分身咩?咁低級嘅錯誤都出得!而且,講得套劇咁大製作,但無論係蝎子精洞、鐵扇公主洞、...甚至所有妖精嘅洞都係一模一樣嘅!好明顯係慳水慳力之作。

 

回應 (0)
我要發表
user