M Club女子俱樂部

都做完咯，依家至講？

因為我一直都唔知自己夠竟對呢套劇點睇？話佢好睇，唔覺！話佢唔好睇，又唔可以完全咁講----唔似得「西遊記」或者「師父？」，睇一兩集經已可以判佢死刑。

上星期播緊大結局果陣，姪女whatsapp問我：

「你覺得M Club 好唔好睇？」

我：「淨係睇阿旦囉！呢種好男人去邊度搵---有足夠空間俾個老婆、但老婆需要佢幫手、佢又一定企響老婆果邊、處理婆媳問題又恰到好處。不過，陳慧珊個妝化得好難睇，真係似個巫婆！」

姪女：「但係佢跳aerobic真係跳得好好喎！」

我：「呢套劇可以吸引一些有類似童年回憶嘅人，但係我嘅童年係往事不堪回首！」

如果要讚，我覺得果幾位年輕時的角色、與長大後的女角真係有幾分相似。亦好似人地話齋：細時靚、大時唔靚一樣！睇吓丹丹同子倫就知啦。

睇倒小詩因為要個老公同佢扭蛋、結果攪到個老公死於非命時，真係火都嚟埋----幾十歲人咁無聊！邊行邊講電話都經已係危險動作，仲要隻蛋跌左出街叫個老公去執：唔係謀殺、都係誤殺啦！

嘉麗個男朋友又係不知所謂---唔係因為佢窮，祇係因為佢從來唔搵嘢做，游手好閒，成日發白日夢，點嫁得落呀？嫁佢難道成世靠大姑奶接濟？

張慧儀與陸永的一段情亦睇到人毛管動。

人生難免有遺憾，成套劇其實無必要做到所有嘢都大團圓結局----肥菜與外藉醫生嘅一段情全無說服力！