黃子華 俾過百隻熊貓圍 快閃 熊貓遊 香港遊 HONG KONG 1600 pandas hk t

自6月9日開始呢1600隻熊抵達香港之後，佢哋就忙住去唔同地方公開快閃，唔少藝人都趁機先睹為快同熊貓集郵，包括周慧敏、舒淇、鄭秀文、蔡卓妍都有同熊貓影相，容祖兒都唔執輸今日都有貼圖。佢哋仲去咗深水埗搵明哥嘅愛心飯堂，明哥仲拎住手機同熊貓自拍，場面好溫馨呢!

今日黃子華都喺facebook上載咗張佢側側哋身，佢好開心咁學地上一群熊貓趷籮影相，子華仲好投入咁留言問句：「邊度有竹食？」

好多網民睇完之後都讚佢呢頭金鬆，其實早前黃子華同鄭中基喺陽江拍攝新片《神秘寶藏》，當時已經染咗一頭金毛o架啦，消息仲話因為每日有唔少fans去搵子華集郵，影響拍攝，今次子華有樣學樣，去搵番啲熊貓集郵。

1600隻熊貓稍後仲會去到尖沙嘴鐘樓、維多利亞公園、電車巡遊、皇后像廣場，陸續遊勻全港地標之後，於6月25日就會抵達PMQ元創方同大家見面。