夫婦分居

最近有網民在討論區吐苦水，聲稱因樓價貴，婚後仍要各自住老家，待樓價回落才置業。有網民指婚後分居不可行，寧推遲結婚計劃。80後Bonnie（化名）兩年前結婚，夫婦收入超申請居屋上限，加上樓價及租金不斷上升，兩人被迫做無殼蝸牛兼「分居夫妻」。

角色模糊 家人微言

Bonnie說：「二百幾萬嘅樓，多數在天水圍及屯門區，交通唔方便。」她指夫家及娘家地方淺窄，夫婦難同時遷入其中一方，婚後至今仍分開住，她指「可能等到生仔，才考慮買較偏遠地區嘅樓。」她承認親友對此有微言，「有時連是否已婚，自己都覺模糊！」

我見：如果得兩個人，都唔願意遷入新界住，我唔相信有左小朋友會咁做囉！到果陣又要預埋將來嘅學校網，更加得個講字！

同屬80後的Kathy（化名）結婚兩年，已在天水圍置業。但為了方便在港島上班及慳車費，她平日仍在荃灣的娘家住，「由天水圍去港島，來回車費近50元，車程又長，所以周末才返天水圍住。」她坦言，奶奶埋怨此舉有違正常婚姻生活。「奶奶經常同我老公呻，呢個問題已變成我們之間的忌諱。」

圓滿關係中心創辦人兼心理輔導專家蔡綺文指，以前鮮有婚後分居情況，但過去一年已有四、五宗求助，全屬30歲出頭年輕夫婦。「有個案係男仔覺得拍拖好耐，唔想拖住個女仔，但未有資格買私樓，惟有婚後分開住。」

我見：係咪一定要有樓揸手才可結婚？呢個係中國人傳統觀念。有朋友計過，你供一間屋(計埋俾銀行賺嘅利息)、如果用嚟租屋住，都夠住過世！當然，租屋住可能經常要搬遷，但總好過要分居吖！而且，住響父母度又食又住有冇俾家用先，如果唔俾嘅、父母梗係唔高興啦！如果要俾嘅、不如用響車費度，咁咪唔駛分居囉。我覺得真正理由係想瞓晏啲啫。

長期分居 爭拗增加

夫婦對「分居」生活模式感惆悵，爭拗由此起。蔡說：「男方反映結婚與否無分別，無論開心或唔開心，回家後想搵個伴分享都無。女方亦常問何時才買到樓，講到這些問題就嗌交。」她又指如婚後分開住，夫妻對自己角色也模糊。「一對新婚夫婦結婚首半年是蜜月期，若這段時間分開住，返到屋企沒最親密的另一半在左右，無論生理或心理都不太健康，亦擔心成婚姻危機。」她又指家人及朋友對婚後分居非議，更會增夫婦之間壓力。

港大社會工作及社會行政學系講座教授周永新指，婚後分居令男女停留在拍拖階段，未能在生活中深入了解對方，不利於維持兩人關係。

難捱貴租 月入三萬上車難

據中原地產去年底公布數字，過去十年樓價由谷底回升約三倍。惟本港過去十年，打工仔入息中位數仍徘迴在約9,500至14,000元。周永新指樓價高昂，即使夫婦月入三萬多，上車也不易。「年輕人不想同家人住，在市區租個500呎單位，動輒逾1.2至1.3萬，扣除租金及生活開支，就所剩無幾，上車更不用說。」他認為樓價超出年輕人可負擔範圍，他們也要鑽空子擇可行之法。

我見：樓價貴呢句說話永遠都啱用。除左發生左一啲難以預見的災禍外(如沙士)，樓價都幾難會跌！我地上車嘅時間一樣艱難(樓價好似較依家便宜，但果陣人工又少啫)，但以前嘅人幾艱難都一樣咬緊牙關捱過佢----搵多幾份兼職囉！依家啲人唔捱慣(父母做成)，好命嘅父母俾埋錢佢上車囉！

理大建築及房地產學系教授許智文指，樓價貴及住房問題導致婚後分居這個怪現象，有違傳統結婚原意。「當樓價貴及交通費貴，令明明結婚仍要分居，令正常關係變到不正常，是非常可惜。」他又指年輕人覺得結婚與未婚無分別，分開生活變相減生育意慾，長遠不利人口發展。

我見：呢樣祇係現代人冇興趣生育嘅其中一個原因啫！最大嘅原因係前境不明朗、養一個小朋友要駛幾百萬，點生呀？有幾百萬都買樓先啦！而且，以前就話養兒防老啫，依家冇呢枝歌仔唱架啦！好彩嘅淨係自己養自己、唔好彩嘅你仲要養埋個仔同個孫添。