幾十歲、卜卜脆！

人地話：十八歲，卜卜脆！我地幾廿歲都係，不過係一扑就碎！

上個月跌一跌，做左十幾次物理治療，雖然漸入佳境，但係唔知仲要做幾多次---點都要做架啦(依家要計住睇醫生嘅次數，過左額就要用者自付)！去年腰骨痛都醫左成年，駛左唔少錢！因為睇中醫，保險冇得索償。

年紀大、機器壞！呢句說話唔單上應用響人嘅身上，用響物件上都係一樣！呢輪除左自己件機器老化之外，連屋企啲嘢都與我同聲同氣：生就一齊生、死就一齊死喎！

首先係屋企果個煤氣爐----開火開唔倒、即使開倒、等一陣無情情自己熄左！咁樣好危險架馬：有煤氣、冇火、容咩易爆炸呀！呢個爐用左五年，過晒保養期，我唔想左整右整，索性買過部---好彩煤氣公司有鋪響我樓下，先去睇爐。嘩！好貴，我幾年前買同類嘅二千幾(唔係煤氣公司嘅，所以咪平好多囉)，依家煤氣公司類似產品接近五千，仲要收成千銀安裝費！大出血呀。好彩佢手腳快，兩日內幫我睇埋位，裝埋！不過，裝左都冇用吖，呢個星期我都唔得閒煮食！

除左個煮食爐，共中一間房部冷氣機又漏水。早兩個月客廳部冷氣機滴水，我當時一次過自己檢查過房部冷氣，開左成個小時都冇滴水，所以諗住冇問題；我瞓覺唔開冷氣，祇不過最近太熱先開過夜，才發覺部冷氣機滴水。搵人嚟整都唔係即刻嚟、佢嚟又要我得閒響屋企先得！唉，總之唔知忙咩？

話口未完，見大廈電梯大堂貼上通告：大廈要做電力提升工程，下星期有一日白天停電。冇法啦！幾廿年樓齡，有需要嘅！但係依家大熱天時，有冷氣、冇風扇，如何度日？今早確定果日會有升降機用，咁都冇咁驚，最多出街搵掟過日晨啫！

唔係淨係老人家先至有事，後生嘅都唔好得去邊。

月初換左部「紅米」手機---貪平囉！不過，當時覺得佢好好用架：畫面清晰、簡單、易用！起初果十幾日，連左線就可以將影左嘅相上載；但係十日之後.....壞了？連左線，睇唔倒原有果個「HMIS」圖示，所以亦冇發法子將相片上載！

早幾日專登走去買機果間鋪頭問。金毛仔答：「係呀！「紅米」機要安裝左個「小米助手」先得！但係其他問題，你要問維修部。」呢種售後服務真係唔得！但係初頭果十日都唔駛攪咁多嘢！當時買呢部機，我係確定左香港有維修部我才買。

回家又跟佢指示，裝左個「小米助手」，但係一樣唔得！佢一樣話我連接唔倒手機資料。

前日打電話去維修部。以前用「三星」，維修部人山人海，朝頭早去晚頭都返唔倒屋企！今次問題咁簡單，我相信打電話去(打電話問功課都可以掛)問都得咯掛，對方答：「你要響部機度做啲設定(我咪跟住做囉)....」結果都係唔得！

對方：「咁我幫唔倒你喎！你拎上嚟睇吓。」

尋日烈日當空，下午兩點幾拎去佢響深水埗嘅維修部，真係香汗淋漓。嘩！奇境--得一男一女，連電腦都冇一部！靜幽幽，似係住宅多啲。

果位哥哥仔用佢條線插落電腦，等左一陣，佢話：「冇問題呀！我睇倒呀。」佢睇倒咋！我睇唔倒，因為部電腦響檯底，仲有嘢遮住。

我：「咁你睇倒咩嘢？」

哥哥仔：「咪你啲相囉！」

我：「咁你點入去？你講個步驟我聽。」

哥哥仔：「你連左線，見倒「HMIS」，跟住......」

我：「你見倒「HMIS」？」如果見倒嘅，跟住啲程序我都知啦，於是信佢啦！

返屋企再試，都係唔得！再打去問(今次醒啦，知道得一位哥哥啫)。

我：「我係剛嚟過果位。我再試過都係唔得喎！」

哥哥仔：「但係我試過得喎！」

我：「你話得至喎！我都睇唔倒。」

哥哥仔：「可能係你部電腦有問題！」咁即係點呢？佢唔會幫我整電腦架！

whatsapp俾朋友，叫佢問吓佢用「紅米」機嘅朋友(佢答左我，佢不在港，回來才覆)。另一方面，打電話俾其中一位男友：「你今晚會唔會響紅磡(跟住講個情況俾佢知)？」

男友：「哦！今晚真係響紅磡，我放左工上嚟睇吓。」電器用品，始終係男人叻啲嘅，我係電子白痴！

佢上左嚟，試左一輪都唔得；當時懷疑我條USB線有問題，但我覺得應該唔係---因為我可以安裝倒「小米助手」。男友跟住去食嘢、再問吓專業人士兼拎左另一條USB線嚟，頭頭尾尾攪左成個小時都係唔得！

男友：「唔好意思，真係幫唔倒你！」

我：「冇問題！最緊要證實左唔係我stupid啫(係都係我同佢都咁stupid)。」

下星期搵日返舊寫字樓借同事啲電腦試吓，證實吓係部手機、定係電腦嘅問題---證實倒又如何？我部電腦做其他嘢都冇問題！即使證實係部手機啲設定有問題，但係使用上冇問題喎、祇係過唔倒啲料落電腦！賣部機俾你有冇包埋你可以將啲資料過落電腦呢？難道咁小事搵律師告佢咩！

咁我以後咪要帶埋部相機出街！

不過，睇果間「紅米」機維修部嘅樣，我相信部手機真係要整，可能都係經呢間所謂維修部拎上國內整！