「錄」老師

唔係曲友，可能唔明我講咩，係曲友一定明！

學唱歌，無論係咩嘢歌：不離跟老師學、拜師學、自學---其實所謂自學，咪即係跟「錄」老師學囉！

「錄」老師即係聽錄音帶學(呢個係傳統講法啫。依家大部份人都聽CD、MD、MP3或上網)。當然，亦有些時既跟老師、亦很大程度係跟「錄」老師。

坊間教粵曲，收費較便宜嘅，一般都係鸚鵡式(唸口簧)教法----一開始教一首歌，便將原唱果餅錄音帶和曲詞分發給學生；隨著教曲者示範、學者跟住唱。因此，學生主要係跟原唱、甚至不能偏離原唱果個框框！這種鸚鵡式教法，很多時學生即使學十幾廿年，都未必識得睇譜唱：一來老師冇要求跟譜唱(甚至老師自己都唔識)、二來原唱亦未必百份百與曲譜相同！不過，一大班人學唱，必定要有一個大原則跟隨，否則阿甲咁唱、阿乙唔係咁唱，一齊唱就好亂。

我有一位曲友很好學，初學唱曲時，曾重重複複聽住原唱嘅錄音帶百多次，誇張到連錄音帶也弄斷了。跟足原唱當然冇問題，問題是如果本身功力未夠，很多時是人家好的地方學唔倒、偏偏將人地嘅缺點學晒兼且發揚光大！

以前有唱片公司肯幫唱者出唱片，唱者一定有番咁上下唱功(我要強調：係以前呀！依家祇要你有錢，即使唱到高不成、低不就，一樣可以做唱片歌星！啲碟有冇人買自當別論)

簡單嚟講，「風腔」好多人喜歡，但係佢始終係真男人，如果女平(女人唱平喉)太刻意模仿，有些腔口未必好聽。羅秋鴻唱歌很有味道，但女平學唱佢嘅歌，除左難學之外、學倒都唔好聽！

我由開始學粵曲至今，很少依賴聽錄音帶；現時，即使曲友約我唱一些我完全唔識嘅歌，我都祇會聽一兩次原唱、甚至並非原唱，心裡有個譜模之後便跟譜唱！

有次我學一首歌，唱完之後老師跟我說：「我寧願聽你唱、唔聽原唱！」(原唱者好有知名度，我都有聽，不過正如我講，聽一兩次咁多，冇深究)

我：「點會呀！我覺得佢唱得幾好喎。」

老師：「你聽吓佢唱果句高音，完全聽唔倒佢唱咩！」(有咁嘅事？)

返閨即刻上網聽番原唱---老師又講得冇錯，以果句嚟講我真係好過佢！(死啦！近墨者黑，學左「哎呀大仔」：老鼠上身呀！)

上星期北上，響曲社認識左另一位粵曲導師。當時其中一位曲友告知：佢老師認為要學粵曲，一定要重複聽原唱成千次才可！而在場的那位導師卻並不認同。

晚飯時，另一位曲友(當時那位導師不在場)不讚成該導師意見，她認為重複聽才可以模仿原唱。她舉例(指著我)：「你正話唱「幻覺離恨天」啲腔口九成跟仙姐，難度你唔聽一百幾十次可以做得倒咩？」(抱歉！我之前真係冇聽過仙姐點唱，我祇聽過吳美英同阿嗲唱。不過，佢咁講我亦無謂否認啦)

返閨又第一時間搵仙姐唱果首嚟聽。聽後我覺得基本上唱法與我手揸嘅曲本差唔多(佢係節自成套大戲，內容又不盡同)，惟一係中間段「木魚」。木魚本身冇譜，唱者鍾意點唱都得！這亦是唱功有所不逮者最驚遇到---一來冇譜跟、二來節奏長短、快慢都考功夫！唔夠功力嘅聽一百幾十次都冇用。我聽番段「木魚」，我同仙姐唱法真係九成似！不過，我並冇模仿佢，我祇係自己覺得咁樣唱好聽啫！或者下一次我又諗倒另一個唱法也不定。即使係仙姐，如果佢再唱，亦未必與幾十年前相同；幾十年前唱嘅，經年累月鑽研，可能諗倒更好嘅唱法也不定。

師承錄音帶，不錯是個捷徑，但基本認識不夠，也就是基本功不紮實。如果對基本常識毫不重視，一切以唱帶為依歸，那粵曲藝術就無法提高！有的祇是「模仿藝術」，高極有限。

或者你會問：「我地學唱歌啫，知咁多嘢做咩？」如果你的要求祇求唱得出，那當然無需知咁多，但那祇停留在學一首、識一首的階段，甚至即使唱果首都唔穩陣，稍為遇著音樂同唱者有少許唔同，便即死！

我咁樣講，可能有好多人唔認同。各抒己見啫，呢啲係我個人嘅意見；坊間唔同嘅粵曲導師意見都不盡同啦！你有權唔同意，不過唔好郁啲攪公投呀、拉橫額呀！如果係有你講、冇我講嘅，咁算唔算係民主自由呢？