強吞必哽

近日見頭痕

占卜又拜神

紅家一句話

諸家喪三魂

據報導指出、在剛過去的周日、真民聯主辦的「傳聞電子公投」參加者數字已經累積超過七十萬人、其中四萬多人是親身前往票站投票。如果數目真確的話、今次公投已創下歷年群眾運動參加人數新高。阿建立刻跑出來指、有人利用電腦程式造假報大數、而那份半官方嘅蠻球日報亦當眾放屁、形容即使支持公投嘅紫荊人更多、也沒有祖家十三億人的多。這類恐嚇言論、莫講話阿民聽來火紅火綠、即使是在下這類一向冇表態嘅小市民聽後也為之扯火。不過今次督爺一見唔對路便彈出來解話、以求達到降溫效果。點知又被抽水政棍食住上、將他插餐飽嘅、呢啲咪就係點做都唔啱嘅寫照囉！

官報屁話雖然俗不可耐、臭不可聞兼且哽耳、但須要注意的就是話講得很明、而且具代表性的。冇錯、人是須要維護自己嘅權利、即使這一代爭取不到都要為下一代做些事。但問題是應該點樣去做、是不是一定要以不成功便成仁嘅態度去做？所謂不成功便成仁等同做不來就死畀你睇。咁搞法、跟屈原投江、伍子胥挖眼有何分別？老屈死了還不是白死？老伍除了令到自己有眼無珠之外、又有啥作為？現實告訴我們、基於雙方價值觀不同、而且彼此之間缺乏安全感和互信、要爭取政治上嘅話語權就須要有耐性和懂得變通才行。如果A計劃行唔通、那就行B計劃啦、再唔啱咪行C計劃囉！總之寧願像蠶食般的一口一口慢慢去咬、總好過開口過大一啖骾死吖嘛！

懂個打枱波嘅人都會明白、何謂唔怕揼波鐘、最怕己技窮嘅道理。現實永遠都是殘酷的、當年鬧得翻天覆地嘅「南天門」一役到咗決定性時刻、有人建議先撤退然後再部署長期鬥爭、有人要打鐵趁熱繼績抗爭到底、結果大夥兒選擇後者、亦因此而落得慘淡收場。國際上奉行民主政制嘅國家立即集體向天朝發動制裁。然而他們嘅所謂制裁、其實係將台面上嘅買賣搬到台低下去做、除了迫使天朝花費更多民脂民膏去獲得買同一級貨色之外、其它啥也未有改變過。當時經濟發展初起步嘅天朝尚且企硬、難道有人認為今天如日方中嘅阿爺反而會腳軟？以老人家今時今日「你進一寸、我進一尺」嘅作風看來、硬碰硬會係邊個蝕底、大概唔使問阿貴都知啦！係冇？