點金勝手

唉！「西遊記」終於播完咯。好彩，無線抽起左原本打算接住播果部----？？BB(肉麻)嘅劇，不過，取而代之嘅都未必好得去邊！

播緊果套「點金勝手」，每晚睇見三個「騎呢」人物，間中打吓冷震！算係響嚴夏中加添左啲冷氣。何解？

我美國嘅大佬、姪仔和上海工作嘅姪女一家人都到左香港，祇逗留幾日便走；尋晚約左親友食飯聚聚。我問姪女有冇睇「點」劇？佢話有。

我問：「覺得好唔好睇？」

姪女：「唔好！不過都好過M Club啦！」

我：「嘩！我見倒林子善個look 就頂唔順；呢套劇響萬勝節出街就差唔多！」

演肌肉(著冇袖貼身衫)、帶一隻耳環(代表咩)、塗黑色指甲兼畫左兩條深黑色下眼線！

正常一間公司，會唔會請個咁嘅人做嘢？如果佢係藝術或者特別行業工作者，咁就冇得好講啦！

呢套劇，佢嘅身份係上市公司老板嘅心腹---智囊、甚至打手(佢唔驚整斷或者整花啲手指甲咩！)

不過，有其手下必有其上司！佢上司都唔好得幾多：

登台look！

又係帶一隻耳環！著鞋唔著襪；衣服顏色夠晒繽紛，彩虹七色有齊---紅係大紅、黃係sharp黃、......還有三個骨褲！雖說是入時著法，但係以集團主席嘅身份，即使幾咁casual都有個譜；咁嘅look、我一定唔會買佢公司嘅股票囉！

徐子珊！唔好意思，越睇越討厭----專著埋啲貼身得嚟就要爆開嘅衫、套套劇(特別係角色仲係當警察)都著埋啲六、七吋踭嘅鞋！點可以搵呢啲人嚟當警察？根本都唔係做嘢嘅款！即使係當文職，要佢行爽步都唔得，我係老板、佢一定冇運行！

佢響套劇果個角色亦令人討厭！自己以為黃宗澤係害死佢老豆嘅人(至目前為止，都唔知係唔係)，便設局要報仇；即使要報仇都祇係一個人嘅事啫，但係佢害左好多好多人，反而害唔倒佢以為係仇人果個！仲要人人同情佢----有咩嘢值得同情呢，佢唔死都冇用啦！