無線收費電視呃人!
幫趁左「無線收費電視」多年。話佢好睇,絕對唔係----兩個電影台播埋啲陳年舊片,仲要不斷日日夜夜咁重播「西遊記月光寶盒」、「桃姐」、「葉問一、二」同埋邵氏N年前啲片;不過,一來我份人比較懶,一向抱住一動不如一靜嘅心態,佢一個月百幾蚊,懶得去攪佢啦!除非佢好似「有線電視」咁激起我把火,咁我可以預時間同佢玩----凡係「有線電視」嘅用戶都知佢幾衰,安裝容易取消難,係我呢啲閒人先有時間同佢玩,結果走入荃灣、自己帶埋鉛子筆、差啲要帶埋影印機,才可以取消佢嘅服務。
「無線收費電視」每次到你差唔多約滿時,便有人打電話俾你---好話講盡,送呢樣、送果樣!計吓條數,都冇咩餂抵,人地又嘥左咁多口水,算啦!放佢一馬,又落左叠。
六月初(我合約未到期),佢地打電話俾我,告知佢地未來兩年因為要配合行數碼電視,要進行一些提升工程。要我由那天開始改用新合約。新合約為期兩年,祇可以收睇十二台以下,收費是現時的一半價錢。
當時我問:「少左咁多台都收$74月費,何解又唔係收齊頭$70呢?」
答:「因為佢地月費係照收舊價,祇不過有些月份唔收,除開嚟係等於$74月費啫!」
我係順得人,幾十蚊月費都懶得講咁多,於是續左新約,由六月六日開始。
其後諗真吓,我實在做左老襯!因為剩番嘅台,好多都係無線嘅節目重播---上網去MyTV免費有得睇!另外一個電影台我甚少睇,衰過天映,但係佢地話天影停播。
六月十二日,收費電視壞了,一個台都睇唔倒!致電熱線,錄音話佢地客戶服務提升左;不過我一點也不覺得!即使搵倒人都要四日後才可以上門維修,仲要約響父親節果日,搏我唔得閒?結果係更換左部佢地聲稱係行數碼嘅機盒。
可惜,一個星期後(六月二十五日)又壞了。今次仲衰,打電話去按幾十個制都冇人聽,於是留言。
收線後唔忿氣,打電話去搵果位游說我續約果位姐姐---佢當時話日後有咩問題都可以搵佢架!(傻嘅,果陣你叫佢託塔佢都應承你啦)
一如所料,搵倒果位小姐並講左個情況佢知,佢話叫佢上司同我講。佢上司話呢啲情況要搵維修部。
我梗係知要搵維修部啦!搵唔倒吖馬。佢結果答會幫我出個電郵俾維修部(我講左第二日唔響香港)。
六月二十七日等到中午,都冇來電。再打佢地嘅熱線電話,亦一如既往,按N咁多個制先去到維修部,一樣冇人聽!咪拎住電話係咁等囉---慘得過我果日預左時間同佢玩!最後又接左去客戶服務。可能我講番上次等左四日、今次留言、電郵又唔覆啲嘢,佢地今次肯第二晚嚟整。結果,又係要更換個機盒!
吓!咩唔係提升質素咩?何解機件越來越差?一個月有七、八日睇唔倒嘅,響公關角度嚟睇、客人唔投訴都應該自動減番費用啦!
還未止。呢兩日佢預告七月中連果個殘片台都停止運作!咁咪即係違反合約----遲啲佢續個台停播,客戶咪白俾錢養佢!
我諗大家如果未同佢續約嘅,唔駛考慮可以拒絕佢!唔好彩好似我咁續左約嘅,不妨諗吓一齊去告佢違約吖----我成世人都未試過遊行請願,攪番次玩吓都好!簡單啲,咪夾錢請律師告佢囉!
我相信咁嘅情況,都係摺埋嘅先兆嚟!
適當時候認老有着數,pccw收我數據錢七百,我又話自己老人家咩都唔識,結果佢給我煩到只收幾十元就算!適當時候做適當的事!高深學問梨架,保護銀包呀!
有時對付啲人真係要惡至得架!
我唔肯認老吖馬!
你唔夠我醒啦!有線比我媽到七彩,取消後唔取機走想收我錢,又比我媽差,叫我自己拎部機去荃灣,有無搞錯?我話我是老人家,唔識搞機,唔識路,(大概7.8年前)結果派人來收機。
我冇申請到,下個月連有缐都cut埋。