視唱、視奏！

早兩星期響深圳曲社認識一位粵曲導師，臨別時佢話下次約我唱歌，跟住問我有冇學新歌？可能果次佢聽我操三首都係舊陳皮歌(幻覺離恨天、蘇三贈別和魂夢繞山河)掛！

我問：「何謂新歌？你指推出一年內、兩年內、還是十年內果啲？對我來說唔識嘅歌、剛學識嘅就係新歌。」

今個月要學五首新歌同人地操----「周仁別妻」、「梁祝化蝶登仙」(應該係新歌嚟)有十日時間學、「七月七日長生殿」(好舊架啦！文千歲、梁少芯唱)有廿日時間學、「別館盟心」、「摘纓會」有三十日時間學！所以話啫，邊個話我好得閒？

前個星期因事冇上一堂「阮」，果堂教左一個新練習；上星期上堂交功課，奏完後老師問我係咪第一次玩？我答：「係呀！上星期我都冇返學。」

老師：「好嘢喎！玩得似模似樣。」

我咁聰明(都話近墨者黑架啦)，如果我肯俾多少少時間響呢方面，一定會飛會「味」添呀！係我太集中響唱果度啫。

唱歌要唱到可以睇住譜唱：「視唱」---譜寫咩唱咩，當然可以加多、減少啲腔，祇要唔係離譜就得！

玩拍和一樣，要學「視奏」---睇倒譜寫咩、奏咩！

要做到視唱和視奏，唱緊或者奏緊呢幾個音、對眼經已要望住下幾個音，否則見一個音唱一個音、或者玩一個音，一定唱/玩唔切！

兩者比較，暫時我覺得視唱較視奏難。人便是人，不同樂器----樂器祇要你調好音，腦、眼與手配合得倒便成！但唱歌，你用腦、用眼、但發聲未必能做到見倒果個音，便能準確發出那個音！當然，有些時音樂可以有提醒作用，但遇著唱梆簧，唱者要帶頭，便要靠自己了。

遇著要轉線----唱唱吓正線，突然轉反線、尺五線或士工線(西樂叫轉key)，如果頭架唔俾先鋒音，唱者更加難準確唱啱果個音！

不過，我相信「視奏」亦一樣唔容易，祇不過我未學到果個階段啫！視奏係睇倒譜寫咩、就奏咩嘢；現實生活，唱果個都唔一定跟譜(其實係一定唔跟譜，不過，如果佢唱果個真係一個腔，唱慣、玩慣都可以跟倒)，你死牛一面頸跟譜奏一定唔得！仲有啲情況係根本唱果個都唔知唱左咩？咁你追腔究竟跟佢錯、還是玩番啱果啲音----響香港，音樂師父一定會玩番啱嘅音；但係響深圳，唔排除佢地會跟你一齊錯(顧客永遠是對的)！所以咁多人喜歡北上，當然棚音樂樂器多左，豐富左會好聽好多，但係好多人喜歡自我陶醉----連錯都跟埋你，你唔知自己錯、咪感覺良好囉！

因此，要學好唱歌真是漫漫長路呀！