各歌入各耳!

2014/07/05 19:02:51 網誌分類: 粵曲理論
05 Jul

我唱粵曲,一向以原唱果個長短速度作為參考。但有些曲友,響操曲嘅時候,都比原唱長,至於是何原因,眾說紛紜----有說自己叻過原唱、有可能唱者回唔倒氣,所以越唱越慢(當然不排除唱者好刻意唱晒所有譜上嘅音,但係唱得唔夠滑,逐個音彈出嚟、聽落生硬而且個節奏亦因此拖慢了)、亦有可能唱者想以另一個方式表達同一首曲。個人當然覺得後者至叻啦!唱者梗係覺得原唱唔夠自己好,所以才加以改良!{#icons_cat2}

唱歌經驗淺嘅,一般會唱得比原唱短。這樣係合理嘅!好似羅秋鴻、陳笑風嘅唱腔,很多經驗淺的曲友都祇係學倒七八成,每個腔短左少少,整體嚟講,成首歌就短一、兩分鐘。

當然,遇到一首歌有一段較長嘅「長花」(冇譜:自由唱!如「蘇三贈別」),那末,曲的長短可能會因為呢段「長花」而令整首歌長了、或者短了。

我依家學唱一首新歌,首先當然要上網聽吓人地點唱----主要係搵番原唱嚟聽!特別係舊歌;如果係新歌,便要搵多幾個唔同嘅人嚟聽吓,取長補短;講真吖,依家啲新歌、很多時真係東施勝過西施架!

呢排都幾邪,每次我即將要操那些歌,「戲曲之夜」便有咁啱、得咁蹺播果幾首歌,而且好多時係一些現場版本,坊間冇得聽架!前日日間挑起條筋,上網聽吓首「倚鞦韆」學唱(葉幼琪、蔣文端卡拉OK版)---因為好鬼容易,聽兩轉都識唱!

又咁蹺,果晚「戲曲之夜」竟然咁啱播一首由「何家光、馮玉玲」唱嘅「倚鞦韆」,主持陳永康響節目一開始經已預告會播呢首歌,抱住聽多個人唱作參考嘅心態,等到零晨十二點半後至有得聽(係咪傻嘅呢,第日聽節目重溫咪一樣)。

一聽,第一個感覺係:嘩!唱得咁慢嘅!兩位唱者曲藝不容置疑,問題是:這首歌是講「牡丹亭驚夢遊園」男女主角初初認識果段,個人覺得應該是唱得較輕快的,但成首歌唱到好似一首悲歌咁---那時經已是夜深,我都好眼瞓,剩番最尾果段都唔想聽,熄機瞓覺!

今早再上網聽番節目重溫,呢首歌唱左26分鐘(一般是20-22分)!平喉聲底似新馬師曾,唱此曲時,用了類似唱「胡不歸慰妻」的唱法;子喉聲甜、亦好刻意將唱腔加以變化。

不過,個人意見覺得:以曲情而論,此曲不宜唱得那麼慢。

又咁啱(六合彩又冇得中),尋晚曲友芳芳來電;我同佢講:「你要我學嚟同你操首歌我攪掂啦!你識唔識「倚鞦韆」?」

芳芳:「呢首歌我1989年仲係唱緊子喉果陣學架!(佢唱左子喉5年、轉唱平喉)」

我:「吓!你有成廿幾年歌齡架拿!(真失敬)」

芳芳:「果陣同學俾左曲詞同錄音帶我聽,又係唱得好鬼慢,聽到我「僕」左響度瞓著瞓!唔知係咪你講果首?餅帶仲響度,你聽唔聽?」

我:「你都話悶到瞓著覺,聽嚟做咩?」

所以,很多時候,唱曲者唱得用心、聲又靚、個個「工尺譜」唱晒出嚟,何解給人感覺是:唱晒首歌囉!冇味道、冇感覺---少左個靈魂!祇是唱晒首歌,冇認真諗吓用咩心情、咩嘢心態;或者一心諗住點樣可以唱得蹺口啲,等人學唔倒!咁樣好難有共鳴!大家不妨留意吓依家啲新歌,越容易、越多小曲嘅越流行。證明真係有心鑽研曲藝嘅人唔多。呢啲咪叫做曲高和寡囉!

大大話話學左十年粵曲,亦很明白每個人都有唔同歌路----有些人擅長唱悲歌(要求:行腔有抑揚頓挫、唱腔細膩、聲線不能不強「識得控制聲線自當別論」)、有人擅長大鑼大鼓嘅歌(聲線天生夠響夠亮、夠條「因為鑼鼓聲通常節奏快」)、有人擅長攪笑曲.(天生係攪笑個樣,唱悲歌都冇說服力)...

如果自己不擅長唱悲歌、而硬要去唱,甚至出「騷」,無異自暴其短!當然,每個人理論上,唱歌經驗久了,唱功亦會提升,目前唱唔倒嘅、唔代表他日做唔倒;祇是要唱好一首歌,真係漫漫長路,即使幾咁努力,都唔可能響幾個星期、或者幾個月可以一步登天!

操曲又唔同,可以嘗試不同曲種。我以前都以為我祇適宜唱悲歌架,呢兩年才發覺,原來我都可以唱大鑼大鼓歌架!唔排除他日我會唱埋諧趣歌添,不過,唔知幾時啫?

 

註:「曲高和寡」:

 
  出處: 戰國楚·宋玉《對楚王問》:「引商刻羽,雜以流徵,國中屬而和者,不過數人而已。是其曲彌高,其和彌寡。」
 
  典故: 曲調高深,能跟著唱的人就少。舊指知音難得。現比喻言論或作品不通俗,能瞭解的人很少

回應 (1)
我要發表
2014/07/06 11:25:59 回覆

倚鞦韆我是聽李龍同南鳳既,多年前操過一次,有一句腔是(小明星定徐柳仙),當年覺得很難。

user