域 流亦詩
域 流亦詩
域 流亦詩

七個一皮

2014/07/10 14:23:27 網誌分類: 時事
10 Jul

巴西又揼雞

包你輸甩髻

買細偏開大

今趟抌穿肺

 

記得在七十年代聽大聲葉(葉觀楫)講波、每當香港代表隊(本地球員組成)或香港聯隊(華洋混合)被外國球隊連數幾蛋之際、就以被人打到七個一皮(章法大亂)呢句嘢去形容當時港隊嘅景況。勢難想到四十年後嘅今日、呢句名言居然被套用到巴西國家代表隊身上去。

 

被譽為足球王國嘅巴西雖然係今屆世界杯主辦國、但國家隊嘅表現卻無半點王者風範。一向以腳底下功夫細膩見稱嘅巴西居然以一比七大敗在德國腳下。全場波所見、巴西球員踢得到喉唔到肺、甩腳、甩波、甩位唔在講、仲連球品都甩埋、莫講話毫無戰術可言、甚致連個人技術都欠奉。雖則話佢哋嘅王牌前鋒尼馬因背傷不能上陣、而且換走埋一名正選後位、但係踢波呢家嘢係踢十一個人吖嘛、少咗兩個正選係就係會有影響、但使唔使輸到七個一皮咁肉酸?當德國隊射到三比零時全個球場鴉雀無聲、射到五比零嘅時候鏡頭所見很多巴西球迷黯然神傷、射到七比零嘅時候球迷已忍不住掉下淚來、甚至連小朋友也不例外、即使當巴西隊射入破蛋嘅一球、但場中並無歡呼聲、外國球迷亦感覺到唔多對路、於是紛紛提早離埸、以免城門失火殃及池魚吖嘛!

 

今次世界杯參賽隊伍忽龍忽蟲嘅表現已經成為家常便飯、不過尚未到決戰時刻就頻頻聽聞有人輸波輸到連條命仔都冇埋、咁搞法認真不智。須知到、人有三衰六旺、在運氣不濟嘅時候所行嘅係衰運、就算財神離遠見到都要運路行、試問黑成咁嘅人點會贏錢架?但凡涉及賭博必有造假、所謂十賭九騙吖嘛、賽果係可以預知亦唔係新鮮嘅事。換言之除咗有內幕消息嘅架忌冷之外、其他人一注押中嘅機會微乎其微、否則又點會有派彩?依在下看、呢啲輸多過贏嘅玩意絕對不宜瞓身落去博老命。巴西輸一比七嘅賠律超過百倍、講唔定有人輸波發大財都未定架!呢嗱、輸完又嚟賭過、來緊嘅週日上午四點將會舉行巴西與荷蘭嘅季軍爭奪戰、而週一上午三點鐘就輪到德國與亞根庭爭奪世界杯、不如約埋一班老朋友齊齊睇波、嘆啤酒、吃零食、順便來一場牙較論英雄看看誰的眼光最醒神、不過千祈咪賭錢呀!

 

 

回應 (0)
我要發表
user

最新回應

*KK*
*KK* 2019/09/18

兄台眼光獨到. 不出一年就有大龍鳳睇了.

"污膠藤"單野, 不知若傳到近日來港的"毒眼寒流柑"之祖家又如何呢? 若彼邦之"安胃女孩像", "神大將軍像", 甚至"安義士像"等受如此對待, 真不知此"柑"會否敢在祖家國民面前仲乜野物野囉...

多年來各大爛仔館既欺師滅祖, 以至人性夏令營等精彩場面, 真係值得透過寒流輸出至全球! 彼此認識, 促進交流呢! 世界必有新氣象, "時代革命性解放"嘛!!!

開心van仔
開心van仔 2019/09/18

你好,很久不見了!我沒有在頭條寫野也有一年了!今天突然回來看看,高興見到你呀!近月心情很沉重,太多負面新聞令人情緒低落,不知亂局何時了!

123331
123331 2018/08/22

亞域哥,「來者應,去者靜。法住無常,止心一處。」謝謝。

開心van仔
開心van仔 2018/08/22

很喜歡看你的文章,為何不寫?你今日的話令我有共鳴!我進入古稀之年,剛做了第二次通波仔手術,對世事已不再熱衷了。只希望可開心過每一天。回望過去幾十年人生,很多事都淡忘,只記開心的事,不開心的由它去!現在對很多事都淡然處之,只爭取多些時間與孫兒們相聚。

祝君身體健康,生活愉快,開心每一天!真希望可再見你的文章!