公社又鬧鬼

大話堂前又一功

行家蝕底勢不容

雙辣構成擋路障

齊心合力打衝鋒

自從紫府拋出一道雙辣咒鎮住「流市泡沫」以來、人民公社內一眾唔受得辣嘅代表就開始發惡夢。由於「流市泡沫」被雙辣咒所制、又適逢家鄉嘅大小老虎都被打到焦頭爛額、令到一眾「流市」炒家頻食白果、而且洗金和洗銀業亦吹起淡風來。由於穿金帶銀而來嘅人買少見少、以致吉鋪無人問津、而且牽起退租浪湖、租金亦面臨貶值。在這情形之下、大概唔使問阿貴都知究竟誰人做咗大閘蟹。若然雙辣咒繼續制住「流市泡沫」嘅話、恐怕一眾大老闆再也按耐不住、到時那群受人錢財而不能忠人之事嘅掹車邊傍友後庭開花唔在講、分分鐘連個飯碗都會被砸碎。在宮能組鬼槍梁提議之下、一項還原歸本法（撕咒議案）被擺上議事桌、目前仍在辯論之中。

平心而論、雙辣咒係用來鎮壓住在「流市」裡面作祟嘅泡沫、說得上是利民措施。以宮能組嘅代表方向而言、要撕毀雙辣咒是可以理解的。之但係居然有兩個代表主流基層大眾嘅幫會居然跟宮能組聯手撕毀雙辣咒、那就令人不解矣！無論是那一派嘅民選代表、他們之所以能夠在人民公社佔據一個席位、完全是靠基層大眾手中一票支持、但今日居然有人為私利而倒伐、那算不算是出賣選民？須知到炒風再現不單只令「流價」飆升、還會拖高租金和引起通漲、飽嘗加風之苦的就是主流基層大眾。除非有人想造起個勢、趁手甩掉手頭上嘅貨尾撈埋最後一筆、否則實在想唔通點解要撕咒囉！由此可見人民代表好多都唔係咁靠得住、而且反映出「流市」前景認真不妙、可惜總是有人喜歡做盲流、埋錯堆、跟錯隊、咁就死得啦！係冇？

有人話亂世出英雄、但眼前所見嘅就係亂世多狗熊。可不是嗎？人在亂世之中、如果循規蹈矩就得個挨字、若然講道義守承諾嗰啲人就更加死得快、只有趨炎附勢嘅牆頭草才能夠無往而不利。呢嗱、尚未到七月十四、咱家人民公社之內便鬧起鬼來喇！你準備好香燭、金銀and衣紙未呀？