拆得就拆！

唱粵曲可愛之處：

一. 遇倒好似唐滌生先生寫嘅曲詞，既優美、亦可以令人遐想吓當時唱曲嘅意境：一字記之曰「正」！有時遇上一些詞或字，而自己又不明所指嘅，我會翻查字典、或者請教有識之士，希望自己的知識亦有所提升---我自以為係咋；

二. 成世人做小人物，唱曲可以幻想吓自己做緊公主、皇后...可惜至今都係做埋啲青樓女子、唱完即死果啲角色....唉！

三. 遇到一些曲詞上的字音有疑惑，有些字以前讀書嘅時候有可能未接觸過、或者當時所教的發音與現在所聽原唱有所不同，我一定會加以求證，絕不會求其了事----咁咪攪到自己周身唔得閒囉！好處係唔會太空閒，胡思亂想。

今日主要講後者，即是字音。

今期的「粵劇曲藝月刊」有一篇文章講到：筆者月前觀看「碧血寫春秋」，某演員唱(夜已蘭，凜凜寒風刁斗冷，擊「拆」鼓催更，金刀馬上橫。」擊「拆」，音「託」，打更用的梆子，竟然給他唱成「擊拆」，音「冊」。看來，演員固然不明白何謂「擊拆」，也不理會自己口中「擊拆」是甚麼。他若有動力去查究，問題必能解決。......今天人們的文化水平比以前高，要求也自然提高。

「情諫」一曲裡亦同樣有句子喉唱嘅滾花：「唏噓難寐倦倚樓，擊拆(音託)風傳催玉漏。」唱者一定要明白「擊拆」為何物，才會明白此句的意思。

此句原唱發音冇錯。如果係我，初聽此曲時，心裡會有兩個問題，一. 佢有冇唱錯、二. 「擊拆」為何物？一查字典便清楚。老實講，我讀書時真係冇接觸過呢個名詞，唔識有咩奇？唔明咪查到明囉！我絕對唔會自作聰明將人家唱啱音改番錯佢。

上例是原唱冇錯，後人唱錯！但更多例子係：原唱錯唱字音，後人蕭規曹隨---有些是不知錯、有些是明知錯都唔改，特別係原唱果位係佢地偶像，更加係神性不可侵犯！

撇開曲藝不談，個人幾欣賞蓋鳴暉。我咁講唔係話佢曲藝有問題，祇不過依家唔係講呢樣嘢，不過有啲做左幾十年老倌、唱歌仲冇次啱線口嘅，兩者相比又真不可同日而語啦。

我聽蓋唱嘅歌，好多以前前輩唱錯左嘅字、佢都唱番啱嘅音---包括佢師父唱錯果啲！呢樣嘢係需要勇氣嘅、亦可能要同師父解釋一輪。但係，如果唱曲者都抱住一動不如一靜、不求甚解，不明曲詞，卻懶得尋根究底，這也代表另一類演者的文化質素，粵劇曲藝仲邊度前程？

尋日同曲友芳芳北上操曲，其中一首係「梁祝之化蝶登仙」。曲詞中有句合唱散板「駕雲霞蛻化彩蝶同飛」。「蛻」字，音「退」：

teoi3

黃(p.41) 周(p.154) 李(p.136) 何(p.303)

退, 駾, 螁 [4..]

--選擇-- 同聲同韻 同韻同調 同聲同調

蛻化, 蛻皮, 蛻變[2..]

意思是毛蟲蛻化成蝴蝶。但原唱唱錯左「銳」音，亦因此「工尺」譜著「士」音；如果唱番啱個「退」字音，「工尺」便要唱成「上」音！如果係獨唱，我一定會唱「上」音，但因為係合唱，所以事先同芳芳溝通吓；原來佢老師亦知原唱唱錯字音，因此將個「蛻」字改成「幻」字，咁樣「工尺」譜便不用改！

不過，據我所知，改人地唱腔冇問題，但可以的話，盡可以唔好改曲詞啲字。但係明知錯、將錯就錯呢樣嘢我點都做唔出，因此尋日唱此曲，我跟芳芳唱「幻化」。