友情上磅！

報載：

一場婚禮，就可考驗新人與賓客的感情？有人在網上慨嘆，收到「環保先鋒」送贈品當結婚禮物；亦有人指朋友結婚時曾出錢出力，自己結婚時，對方卻「人、禮」也不到。專家建議，新人應記下人情細節，日後禮尚往來免傷感情。

香港人情比紙薄？一位女網民聲稱，去年捱義氣為不相熟的朋友做伴娘，「我同佢識了幾年，唔算十分老友，當日由朝六做到晚12，兼且做足四位數字人情！」豈料事主今年結婚時，卻從對方手中收到一份2013年的免費贈品，該女網民不禁慨嘆：「自己結婚就要人幫佢做到好好睇睇，人哋結婚佢就無眼睇！」

借車兼做司機 利市都欠奉

不少人留言表示有類似經歷，有網民教路：「你將佢件禮物放上facebook多謝佢，仲要tag埋佢，加多句：多謝你的厚愛！」但事主最終選擇留一綫，沒有公開這份「厚愛」。綜合多位網民結婚時收過的「騎呢」禮物，包括水晶盒贈品、刻上他人姓名的回禮裝飾品等，有人揶揄送禮者「夠晒環保」，再見也不再是朋友。亦有人打趣說：「我收過萬寧禮券，依家覺得那人真好。」

另有網民講述親身經歷，指友人結婚時，送贈鑽石耳環及1,600元人情，「到我結婚，佢無到場亦無送禮！」亦有網民替丈夫不值，指他借車給朋友做結婚花車，更充當司機，「對方沒有畀利市，事後亦無再聯絡。」

香港專業婚禮統籌協會婚禮統籌總監譚凱恩表示，中國人較傳統和實際，送結婚禮物多為現金或實用禮品，如相簿、酒杯等，甚至預先問定好友想要的心水禮物。她亦聽過有人把贈品當禮物，例如小型家電、信用卡贈品等。

大型兄弟姐妹團 易生衝突

她續說，近年流行大型兄弟姐妹團，由以往十多人增至二、三十人也有，「新人未必有咁多親密朋友，又要湊夠人數，只好找不相熟的朋友，難免會出現利益衝突。」她建議新人認真記下親友送贈的人情，「不是算帳，而是將來可以禮尚往來。」

囍宴坊負責人林志華則指，從未聽聞有人送贈品作結婚禮物。近年反而有賓客除了做人情，還給新人送上婚宴當晚攪珠的六合彩票搞氣氛，「雖然只是10至20元的電子票，但大家也開心」。

環保肥皂家具 送禮佳品

近年環保概念也滲入婚禮中，如要送贈得體的環保結婚禮物，又有何選擇？2012年與太太舉行環保婚宴，以草編指環代替鑽戒的社企自然脈絡總幹事莫皓光認為，結婚禮物在乎於心意，即使一張心意卡亦勝千金。

他建議，可親手DIY一些肥皂或潤唇膏產品送贈新人，合乎環保又實用的原則，「將蜂蠟加熱，加入香油或精油，然後冷凍即成」。

社企悠學坊創辦人車慧蘭表示，若嫌DIY不夠大體，坊間亦有不少有機、公平貿易、環保概念的肥皂品牌店，也有以環保木材訂製的家具，送給新人作禮物，既實用又環保。

我見：

愛情與友情一樣，不可以用秤去量：付出與收入永遠不對等！

如果係真正係朋友，無須太計較---友情唔可以用秤嚟量！要睇吓雙方本身經濟條件。如果你咁啱遇著一位富有朋友擺酒，響六星級酒店設宴，酒席幾萬蚊一圍；而你本身經濟條件較差，冇可能封二、三千蚊人情！如果大家係老友，應該明白你的處境，咁即使人情較少亦不應計較，否則對方可以唔請你飲----我諗你都寧願係咁！

當然，記下對方給你的人情數目，作為他日有機會回禮時參考亦無可厚非：但係酒樓等級，日子相佢(銀紙會隨時間貶值)亦要考慮。

不過，真正朋友有好多嘢考慮：譬如，對方雖然人情做得唔多(因本身經濟問題)，但係出左唔少力，亦俾左唔少意見(有錢出錢、冇錢出時間都一樣啫)，咁經已唔錯架啦！唔應該單單以人情多寡來決定！

早前一件俾網民鬧爆事件咪係事主講：少過五百蚊人情唔請人飲囉！唉！冇錢咪唔好請飲囉。難道你請飲預親朋戚友同你埋單、甚至有錢袋落袋咩？

我又唔知果啲禮品係咩嘢，如果禮品係實用嘅，又唔駛咁介意；如果係大公司禮劵，其實等同現金啫！總好過送啲買番嚟、但係又唔實用嘅嘢、好似酒杯之類。