有功/無功者，飯餸皆留！

古時有句說話：有功者留飯不留餸，無功者飯餸不留！

我兒時的家規(淨係適用於我啫)，正常吃晚飯時間未回家，便飯餸也不留---要自己搵食！有一段時間我放工後要去老板家，幫佢個小朋友補習，因此每天都要自己出街搵食。

尋日「哎呀細仔」新居入伙，我地「哎呀一家人」便借啲倚去佢新居打攪，趁機竹戰。細仔話晚飯佢煮。我同佢「哎呀大佬」反應係：「吓！你要打麻雀，邊有時間煮飯？」原來「哎呀家嫂」下午五點幾便收工回家，到時佢做替工打麻雀，細仔便可一顯廚藝。

講真吖，現今香港人都好少會留人響屋企食飯---一來香港地地方淺窄、二來主人家又要招呼客人、又要做餐死都好辛苦啫！所以我一向約班豬朋竹戰，都係打完落街食飯，乾手淨腳。以前去拜年，間中都會響親友度食晚飯；依家，人地連作狀留你都唔做，醒目嘅見人家差唔多開餐就好走啦，難道等人地下逐客令咩！

唔好以為餐飯好求其---五個人食：一雞三味(豉油雞、咸雞、雞雜炒青瓜；幾驚佢學肥媽整一雞十味呀：我講明「炸雞皮我唔食架」)、豉油皇炒蝦、清蒸石斑、鹵水鴨脷/雞翼、炒菜心。發唔發覺有問題呀？....食七！

於是將菜心分開兩碟，砌夠八味餸！還有紅酒及飯後果。

賽果：打左十二圈，大仔和另一位朋友各輸幾十蚊俾細仔，即係有功啦(有貢獻)；我今次有好收場，冇輸冇贏(即係冇貢獻)，但係大家食得開心！

早茶大仔請，我尋日帶梳香蕉(淨係俾左封利事仔咋)玩足成日，係咪好過份呀？