人性‧貓性
2014/07/18 10:41:28 網誌分類: 生活
深水埗有間窗簾舖的肥貓金金紅爆區內,店主話佢極懂人性,佢哋兩公婆嘈交時,金金會企喺兩人中間好大聲叫,好似叫佢哋唔好家嘈屋閉一樣,令佢哋無辦法再嘈下去。 貓的確是家人,所有家事都關佢事。 米米不時管制我的行為,例如食早餐要慢食,佢會跳上我大腿坐足半小時,推牠落地佢會再跳上來;如果我太遲回家,牠會喵喵大叫鬧我;有時見我坐在電腦前太耐了,佢就扮精神大使,先靠近我打字的手挨挨碰碰,再整隻躺下來,擺出一個令你心都溶的笑臉望住你,你不得不稍停下來摸摸牠;這是牠勸我休息一下的方法。 最近掛住追劇,捧住iPad通屋走,或者在房內不肯出來,米爺很不滿,趁我放下去廚房飲水時,一個箭步壓在iPad上面,推極唔走……我又只好投降,暫時放低「紙牌屋」的爭鬥,陪佢哋玩拋紙團。 貓兒是家人,要求的也不多,不過是希望我們摸多一兩下,別讓家人心碎啊。 關慧玲 |
米米個樣超不爽,哈哈!
雖然管家,但孝順呢! So sweet.