新電腦

13年2月結婚之後冇咩時間, 份工又成日OT, 燒餅假期唔多, 用左好多黎搬屋。8月知道有BB, 更加冇時間- 雖然決定唔再返工, 但成日要睡覺(孕吐到胎兒5個月), 之後又唔想出街 (怕俾人撞肚), 14年3月尾生左仔仔, 更冇時間, 而且好難出街 (怕拐帶呀)~ 出去都係去產後檢查、母嬰健康院、派姜醋, 仔仔滿左3個月之後先多少少出去, 去老爺奶奶度, 同埋去我以前屋企。

電腦啦喎... 只係搬左部NETBOOK過黎, 用電話卡上網, 有時會駁電視個大芒, 直到今日- 14年7月中, 足足等左一年零五個月, 終於有真正既電腦用! 不過都只係手機上網俾既訊號, 仍然係慢。至少, 遲D DOWNLOAD返PHOTOSHOP同其他軟件, 可以玩好多野- 只要仔仔睡著左。

依家既生活其實... 由於燒餅晚上11點半先放工, 仔仔起碼晚上12點半先沖涼 (擔心自己一個應付唔到), 飲埋奶都1、2點(佢唔肯飲奶粉, 但奶粉幫助戒夜奶), 咁我同燒餅都零晨先睡, 我就同仔仔睡到下午1、2點 (睡唔足架, 佢會起身飲奶), 之後整D勁簡單既野好似阿華田加梳打餅做BRUNCH, 煲飯之後加腰果或花生食, 又有時放D雪櫃既肉加紅棗、杞子黎煲湯, 其他時間同仔仔玩, 仔仔飲奶, 或者自己執野, 或者改仔仔D衫, 或者改自己D衫, 或者睡覺。基本上係足不出戶既少奶 =口="

有電腦, 都要顧住仔仔既。希望TIME MANAGEMENT因為電腦既出現而變得更加好... 唉呀, 仔仔哭緊, 去理下佢先。只要佢唔係睡, 就唔敢離開佢五分鐘...