錢緊要過親情?

所謂親生仔不如近身錢! 又有話 : 涉及錢, 老豆都冇情講! 呢種喺真理, 古今一例, 東西貫通! 睇報紙睇到單新聞話有一個擁有好多舖位同物業嘅醫生, 要同親生老母打官司去攞番屬於自己嘅物業! 縱然喺清官難審家庭事! 事情攪到上法庭, 就真喺冇彎轉冇情講! 之不過, 手頭上都有咁多單位啦, 點解唔放過老母?

就算老母幾唔啱, 最低限度都生咗自己出嚟, 之後供書教學, 從BB到成長嘅食用醫療居住同所有雜費, 怕且條數都唔細噃! 而家比番層樓比老母當喺報答養育之恩都唔喺過份, 最怕喺冇良心, 有咁多單位都唔捨得一層半層! 人要飲水思源, 冇老豆老母一時唔覺意攪咗自己出嚟, 冇呢個身體, 又點可能搵到錢買咁多樓?

所以話老豆老母真喺有好大功勞架! 比層樓兩位老人家安享晚年, 都喺做番仔女應份嘅孝道, 一啲都唔會蝕底! 可能呢頭孝順父母, 嗰頭搵錢仲多; 可能呢層比咗老豆老母, 嗰頭賺到錢買多幾層都未定! 最重要嘅喺呢位醫生有冇結婚? 如果有結到婚, 咁有冇仔女? 如果有仔女, 你估佢哋睇住你咁對亞爺亞嫲會點稔?

喺唔喺想自己老咗嘅時候, 仔女會抄足版本嚟對付自己? 如果唔想, 就好應該做啲身教嚟引導仔女, 應該用咩嘢嘅態度對待父母. 而家老豆親身示範點樣對亞爺亞嫲, 日後你哋就要學下點樣對我呢個老豆! 咁樣一嚟, 必定父慈子孝兄友弟恭! 咁著數嘅嘢點解唔做? 又點解唔早啲做? 又點解唔想兼唔肯做得咁老襯呢?