五個女人！

之前寫過「十個女人」、又寫過「三個女人醉眼看世界」，今次「五個女人」個半墟，講咩嘢呢？講「鵝文」。

「俄文」除左俄國人，識嘅人應該唔多；至於我地講嘅「鵝文」，識嘅人更少，因為連「鵝」都聽唔明！

尋日上「幼稚阮」課。平時我地一下課同學便作鳥獸散，尋日一下課等電梯果陣，有同學問：「有冇興趣一齊飲茶？」識我嘅都知我唔食午飯嘅，不過大家一齊上課有成四個月，連大家個名都叫唔出----課室有個彎，即使一齊上堂都未必見得倒！既然如此，我都一齊去啦---收吓風都好！唔響度、容咩易俾人攞嚟做話題架：有邊個人背後冇人講吖？

點解得五個人？因為部電梯每次淨係容納五個人囉，而且人少好吖，可以瞭解大家多啲！去到酒樓開埋位，跟住大家各自報上名來。我：「我叫阿VAN呀！」

其他四人：「啊！你就係師父成日叫住果個。」

我：「冇法子啦！我個「阮」插左喇叭，撥錯音、撥錯節奏，師父第一時間聽倒，咪成日攪針對囉！」

另一位師姐：「唔係喎！老師係讚你喎。老師讚你果次冇上堂，第一次睇倒份譜都可以即時視奏喎。」

我：「有咁啱得咁撓啫！果次段小曲係一拍八個音，八份一拍比較容易玩啫。」

又另一位師姐：「唔係呀！我有陣時玩亂左、我都係聽你玩個「阮」啲音嚟跟！」

五個人，得我一個玩「阮」，其他幾個玩「洋琴」。我地總結一隊中樂隊之中，玩洋琴係最辛苦嘅---佢唔係頭架！頭架要休息、洋琴必須要撐住，一首曲如果中間有一大段長嘅口白，好多時亦係洋琴一個獨挑大樑。

我：「我一早打聽左，我地上左年紀才學吹笛嘅、最容易係學阮架啦！」

其他四人：「你以為啦！成隊樂隊、得你一個玩低音，所以阮係好重要架！即使一個幾便宜嘅唱局，阮係唔少得嘅，所以你好重要架！」

佢地幾個玩洋琴有幾年，不過都學民樂，四人中又得阿M一個唔識唱粵曲。

我問M：「你唔識唱粵曲，何解會嚟學伴奏？據我所知，玩民樂、唱同奏係同步嘅，係粵曲才有追腔呢樣嘢！」

M：「咩嘢叫做追腔(我地未學到)？我因為視力衰退，睇嘢唔夠快，所以諗住學粵曲伴奏咋。(佢諗住第日可以做大師級，嗡埋眼都玩倒！)」

其他幾個：「咁你一定要學唱粵曲，否則玩到追腔你一定唔掂！」

不過，我地幾個都好興幸遇倒一位好老師。佢地幾個響出面學洋琴，由大棚上課至執私鐘都試過，但係佢地話響呢度上左四個月課，老師講嘅樂理多過佢地學左幾年嘅嘢。

剛上果一課，教「附點」練習。老師問：「你地咁多人學唱粵曲，有幾多人知「附點」係咩嘢？」跟住真係好多人搔頭(我就知呢，不過唔講俾你知)。

因為坊間一般教唱粵曲嘅，都唔會教「工尺譜」同樂理，所以唔識嘅大有人在。即使有教、亦冇我地依家講得咁清楚。講一個黑色笑話：

我曾經跟過一位老師上課，佢好多時都會講多少樂理俾我地知嘅；祇不過未必講得咁詳細、亦未必個個學生都咁上心---事實上，好多人上堂(甚至跟幾個老師)係為左多啲機會「出騷」啫，你同佢講樂理(等同講耶蘇)，走梗！

該位老師每教完一首歌，都要學生一對對出嚟唱俾佢聽。那次有位同學交功課，唱到一個腔慢左(果個腔係一拍要唱晒，中間有個附點--老師上課時講：果個附點係停頓位，唱到果度一定要停，但係冇講要停幾耐)，呢位同學重覆左幾次都仲係錯！老師開始不耐煩；那邊廂果位同學都好鬼勞氣：「老師，又係你話遇倒附點要停架馬，依家我停你又話我錯！」佢講果陣語氣都好差。

老師更暴跳如雷(俾個學生挑戰)，結果：老師叫個學生以後唔駛上課，佢唔會為左一個月幾百蚊折腰。

響呢件事中，我以旁觀者角度睇：其實兩個人都冇錯！響果一拍裡面那「附點」是要停，但係老師冇仔細講要停多久，所以問題便發生了。我地學伴奏，便要清楚知道當見倒「附點」時，那「附點」響果個位置的時值---可能是1/8、1/4，亦可能是1/2拍，那便知道要停多久或者延長多久，亦知道在唱粵曲的時候那一處可以作為偷氣或呼吸位。

所以，學伴奏與學唱粵曲其實兩者有相輔相成作用！

以上所講嘅「鵝文」，有幾多人明呀？