又講「鵝」文

尋日講開「劉三姐」，原來好多網友都睇過(哈哈！暴露晒年齡啦)。呢套山歌片，我大大話話睇過六七次！唔係錢多，最初上演果陣係跟家姐去睇(家姐果陣係工廠女工，所以有錢睇戲！我地一張入場劵兩個人睇：可想而知我幾細啦)、其後係睇電視重播。

以前我細個嘅時候，冇娛樂、冇活動！課餘祇識得做手作搵錢俾阿媽---手唔得閒、淨係個口得閒；個口得閒又冇嘢食，咪用佢嚟唱歌囉！唱歌好吖，一來唔駛錢、二來可以虐待人！

因此那時候，唱歐西流行曲：Changing Partner, Unchanged Melody, Five Hundred Miles, A Little Bit of Soap....粵語流行曲：分飛燕、....國語流行曲：郊道、送君、小放牛....粵曲：鳳閣恩仇未了情、帝女花、.....甚至山歌/黃梅調...真係嗡得出嘅歌都識唱！有冇懷疑？頂晒籠得果十多歲，識咁多英文、國語、中文字！唔識架---不過呢個世界有所謂唸口簧架馬，我啲普通話基本上都係咁學番嚟。

祇不過近呢十年專攻粵曲，其他嘅歌都冇唱；再者，近呢十幾廿年啲流行曲，真係聽唔入耳(你out至真)。

星期六晚上要唱酒樓「騷」，朝早去理髮。見倒髮型師阿紅，我問(係咁倚都要搵啲嘢講吓架，咁梗係要投其所好啦！上次佢問過我唱歌時一啲廣東字法音問題)：「呢排仲有冇唱K呀！」

紅：「有呀！不過，依家唱緊首？(因為風筒聲好嘈，佢講左兩次我都聽唔倒係咩嘢歌；你耳退化至真)唔知點解唱到某一處，次次都唔啱音！我俾你聽吓，你話俾我聽係咩嘢問題！」

我：「我唔識首歌(當然唔識唱啦)，好難教倒你喎！唱國語歌，你咪唔駛驚有鄉音囉！」

紅：「係呀！」(即刻俾個手機我聽原唱)

我：(聽左兩句)「咦！係內地電視劇「蘭陵王」首主題曲喎！」

紅：「係呀！」跟住俾佢唱果段我聽。唉！果度好鬼嘈，加上我耳退化；聽得倒係有啲問題，不過我真係唔識唱果首歌----是但俾個答案佢啦。

我：「流行曲：唱同奏係同步進行嘅，如果你依家跟卡啦OK唱，你聽得倒自己唱嘅音同音樂唔同(咁佢耳軌冇問題啦)，咁唱多啲就得架啦！果段又唔係特別高音、或者特別低音，所以你唱唔倒！」

紅：「我依家覺得低音仲難唱！」

我：「係呀！女人唱低音難過高音、男人唱高音難過低音，係正常嘅！每個人唱歌聲音領域唔同，有些人好廣，可以唱好低音至好高音都得、有些人祇局限響中音領域！如果祇係差一個半個音，用正確方法可以鍛鍊倒！至於拍子感，有些人天生便有；如果冇，當然後天努力亦可，但一定要下苦功！」

紅：「我最近亦有唱英文歌，一唱到快歌便跟不上。」

我：「哦！英文字、有陣時一個字包含左幾個音---你睇吓詞典個英文字Dictionary係有四個音。但係中文字每字一音，我地唱粵曲遇到快板，一分鐘內唱幾十個字咪仲難！所以，遇著呢啲快板嘅歌，最緊要係熟曲詞---我地唱緊呢個字，對眼經已望緊下面幾個字；絕對唔可以抱住見步行步嘅心態(做人一樣啫，要有計劃架)。當然，最理想係可以背倒曲啦！」