秋江哭別

2014/08/12 13:38:21 網誌分類: 粵曲理論
12 Aug

如果見倒個標題,感到一頭霧水的話,便不用看下去---因為你唔會明白我講咩嘢!

但是,如果係喜愛粵曲,聽過「帝女花之庵遇」,一定記得裡面有段曲,平喉唱:「飄渺間往事如夢情難認.....」(另一曲「秋江哭別」亦是以此小曲為主);事實上,「庵遇」呢首曲有大半首都係唱呢段小曲「秋江哭別」。

粵曲最初是由梆簧組成,祇有叮板(西樂所講嘅拍子」),其後才加入廣東小曲,好像「帝女花之香夭」便成首曲都係用左小曲「妝台秋思」嚟唱。據知,呢首小曲原本叫做「秋思」,是已故名音樂家王粵生先生旅遊時,發現呢首小曲,覺得璇律優美,於是譜上曲詞成為「香夭」一曲。

其後,亦有不少粵曲裡面都用左呢首小曲,好像「

花田錯會」便有此一段。小曲的璇律是固定的,所以你祇要熟識佢嘅璇律,日後見首曲度有「妝台秋思」,便識得點唱。

亦因為係固定璇律,自由度少了---第一:唱者不能好像唱梆簧咁,隨個人喜好去改個璇律;第二: 小曲最初祇有音樂,沒有唱詞!音樂可以玩到好高音、或者好低音。但係,人有局限,太高音、有時即使唱得倒,都未必好聽。因此,粵曲中加入這些小曲,很多時會改唱「反線」、「士工線」甚至「尺五線」(即是西樂嘅G、B及F調或key)。

「秋江哭別」本身好多高音(粵曲裡面,在「工尺譜」中見有雙企人號),即使用反線唱(比正線或C調低)有些人仍然會力有不逮,因比每遇到一首粵曲中加有「秋江哭別」這小曲,通常是用「尺五線」唱(比反線還要低)。如果用「尺五線」都唱唔倒,唱者應該唔好唱呢首歌囉(特別如果係選歌出「騷」);不能為之、而硬要為之無異自暴其短!

另一首小曲「紅燭淚」(曲詞:身如柳絮隨風擺....),熟悉粵曲嘅人亦一定聽過,則多是用「士工線」唱(較正線低、較反線高)。除了因為遷就唱者的音域外,用不同「調」(key)去唱某段曲是因為用不同調唱出同一段曲,係有唔同調性或者韻味。「庵遇」中的「秋江哭別」小曲如果改用正線唱,可能聽落會好激昂!

何解今日要講呢個話題?事緣我月尾出「騷」便是唱「庵遇」,原本係同「哎呀細仔」唱嘅,誰知佢臨時臨刻話唔想唱,叫我搵第二個唱。佢講果陣連海報都印好晒,唔係人人都肯制!咁咪要打人情牌囉----搵曲友芳芳幫忙。雖然細仔話如果對方唔識唱「庵遇」,可以改歌;但據我所知,呢首歌係贊助機構點唱嘅,我覺得盡可能都唔改啦!芳芳有廿幾年歌齡,呢首歌伴住我地成長嘅,佢冇理由唔識吖!不過,原來我雖然識左佢七八年、亦經常一齊操曲,原來我地從未操過「庵遇」,反而操過幾次「觀柳還琴」!我跟她說:「如果唱「觀柳」當然安全啲。」

芳芳答:「哦!還有個多月,我又有呢首歌嘅卡拉OK,應該冇問題嘅!」

芳芳每月響香港有個唱局,於是叫佢個拍檔陪佢操(呢個局係會員制,我唔可以加入);上星期佢跟同學北上,又情商老友幫佢操一次-----哈哈!由頭到尾佢都未同我操過就出「騷」咯,問你驚未?

香港局---芳芳位拍檔以前唱開子喉,依家年紀大左唱唔倒子喉!因此,佢一早同芳芳講:「你操你自己唱果邊啦!唔駛理我。」

北上果個唱局,芳芳一早同我講左邊位朋友幫佢操。聽後我的反應是:「佢冇可能唱倒「庵遇」,高音太多!」

結果,芳芳尋晚打電話報告:「果間曲社每局$1,600(人仔喎),社曲份曲詞跟你俾我果份一樣,但係班師父玩唔掂($1,600一局算貴局,連家傳戶曉、耳熟能詳嘅歌都玩唔掂);加上拍檔唱呢段「秋江哭別」時,全部key唱低左(唔啱線),班師父更加唔知玩到似咩!」唱完出嚟,佢同拍檔講:「果段「秋江哭別」你唱得太低啦!」佢拍檔答:「「尺五線」係低架馬!」

「尺五線」冇錯係較「正線」同「反線」低,但呢段小曲正因為太高音,所以才改用「尺五線」唱。所以,即使用「尺五線」唱,其實都好高音!

其實無論唱者唱成點,遇倒小曲音樂師父便應該跟譜奏---譜寫住「尺五線」便用「尺五線」奏。因為果段歌係對唱,唔可以因為一邊唱唔啱線(唔啱key)便成段音樂唔掂!除非唱者一早講明係用其他線口唱(唱者有咁嘅權,但係要一早講明)。

我一直以為呢首大家都咁熟嘅歌,冇咩嘢難度;但觀乎芳芳操左兩次,都係有問題,其中有段「中板」,佢嘅唱法同譜有出入,佢同我講佢有啲擔心!

我答:「唔駛驚(阿Van響大廳),下星期大操(rehearsal),如果夾演出果棚音樂都有問題才算啦!而且拍子有少少出入,一是你改唱法跟譜;如果唔得,咪照自己方法唱囉,反正唱中板係音樂追唱者腔嘅(拍子較自由);仲係驚嘅咪唱之前同師父單聲囉!好小意思啫---大操完左仲有成十日時間,有咩嘢到時至諗啦!」

 

回應 (2)
我要發表
2014/08/13 20:45:32 回覆

果然熟曲呀,老江湖! {#icons_cat2}

2014/08/13 20:22:06 回覆

老江湖,藝高人膽大,無有怕。

紅葉無粧台,花田才有。

user