細蝦大！

依家習慣左差不多每天食早餐前或後，都會去超市買吓嘢---===日用品或餸。有啲餸我鍾意去超市買、有啲我鍾意去街市買。

以前我細個嘅時候，成聽聽人地講：「大蝦細，俾屎喂！」咁如果細蝦大，又點呢？好似係「冇所謂」喎！大家點睇呢？

早一個星期見倒有個臨時檔口，放住一份份大頭菜響度賣，每份十蚊。當時猶豫緊好唔好買呢？因為一份都好多！而且較早前響街市買過一次煮，覺得果次買果啲大頭菜大淡口，原全冇味道！雖然話唔好食得咁咸啫，但係完全冇味嘅，咁買嚟做咩嘢呢？

正在諗緊果陣，賣嘢果位阿姐叫我試吓食(佢切左啲大頭菜絲響度俾人試)；試後覺得佢雖然淡口、但係有大頭菜嘅味。我問：「要浸幾耐？」阿姐答：「唔駛浸架，你洗吓佢就得。」心裡面都係半信半疑。

十蚊咁多！

尋晚諗住今日整古法蒸魚，可以買鯇魚或者桂花魚。我對桂花魚有成年陰影，自從幾年前我阿媽唔煮飯之後(果陣佢餐餐蒸桂花魚、食到我怕！桂花魚其實好淡，冇咩嘢味，一定要用古法蒸)我都冇買過嚟食。桂花魚相對鯇魚梗係貴得多啦；雖然如此，最終都係決定蒸桂花魚(睇吓可唔可以趕走左呢個陰影)。

古法蒸要落少少肉絲嘅，所朝早去超市買瘦肉----街市買得多食唔去、買得太少又唔得！所以我鍾意響超市買，鍾意幾多揀包啱自己用嘅。不過，無論幾少我剩係蒸魚都用唔晒，於是諗住滾冬瓜粒湯用埋佢。

肉檔響超市入口直入。我入到超市，見有個女孩(大約七八歲)響我左面跳來跳去，眼見佢將要響我左手面褪後撞埋嚟！醫生上星期經己叮叮囑我日後小心啲，千其唔好再跌親(幾十歲、啲骨卜卜脆)。響咁嘅情況下，我即刻將隻左手向前伸，諗住如果佢真係撞埋嚟、我就發力頂住佢。好彩！佢剛剛掂倒我隻左手便停低，所以我隻手剛掂倒佢件衫。

眼見冇事，我咪繼續向前行囉！點知聽見佢響後面大叫：「佢推我喎！」好明顯，果個細路想屈我推佢，叫同行嘅大人幫佢出頭！

我即刻掉轉頭對佢講(當時大家有幾步距離)：「第一：呢度唔係遊樂場，你唔理其他人嘅安全響度跳來跳去經已唔啱；第二：我祇係為左保護自己，唔想俾你撞跌；我當時淨係提起隻左手，我連力都冇用過，我點推你？第三：我後面大大話話有十幾人跟住，我相信佢地有眼嘅都睇到正話發生咩嘢事！(如果你有跟住我，你會唔會答睇唔倒吖)

我講嘅時候，都預左可能佢嘅家長會幫佢出頭。不過，有理者橫行天下、冇理者寸行難行(呢句嘢係我講嘅啫)如果真係有家長幫佢，我會講：「不如問吓超市會唔會有閉路電視？如果有嘅，大家睇番就清楚晒啦！不過，攪到咁大件事先還我清白嘅，我會告埋你誹謗！雖然你年紀細，唔會要你坐監，可能係「警司警誡」、或者罰你正式向我道歉。」

奇怪！講左咁耐，竟然冇大人幫佢出頭(邊個同佢嚟架呢)----響啲咁嘅情況底下，我係佢家長都咋唔識佢啦！容咩易俾人話我冇家教架。最終，果個女孩咪冇癮走開囉。

熟悉我嘅人都知，我係一個多做事、少說話嘅人！何解今次會咁激？第一：我一生人最憎俾人屈(細個俾人屈得多，每次人地做錯事，結果俾人「籐條炆豬肉」果個都係我)：第二：咁細個人仔，響啲咁擠迫嘅環境下跳來跳去經已唔啱(好多時我都見有人鬧佢地)，但係我都唔會當係一回事；不過，佢自已唔啱仲要惡人先告狀去「屈」人，大個左點算？