火腩春菜煲

春菜是潮州菜食材之一，你去打冷鋪，佢門口通常都有一煲排骨春菜。春菜味道有點似我們的芥菜，幾襟煮，而且早一晚煮好第二日食、或者好似我咁早上煮定、晚上食會更入味！

潮州菜通常用排骨煮，我用火腩---好貴！好細舊都成三十蚊(春菜買左五蚊！真係妹仔大過主人婆)，不過買排骨一樣唔可以買太少啫！如果有心試整嘅，可以趁有燒肉食剩左用嚟煮呢味餸----我家無隔日粮，焗住要買啫！

材料：

春菜半斤切長段飛水

火腩一舊(大小隨意啦)飛水

蒜子炸過幾粒

唐芹段少許

薑2片

浸軟冬菇2-3隻

上湯或水

魚露調味

一. 燒油爆火腩、冬菇，及上湯/水(呢味係湯菜，湯份量可以較多)，滾後轉慢火煮至出味。

二. 開大火，加入春菜、唐芹，以魚露調味，煮至春菜稔。注意：煮時不可蓋上，以免久煮春菜變黃。

註：

一. 潮州菜或泰國菜都喜歡用魚露調味。有些牌子的魚露很咸，自己要留意；再者，有些時火腩也會很咸，所以調味要自己留意。不過湯底煮好時有機會試味，可以加少少糖吊吓味。

二. 春菜先飛水可避免煮時出水，令湯味變淡；火腩飛水是要洗去油份，唔怕嘅味慳番囉！

三. 臨煮好時，可加入少許普寧豆醬，那便更加潮式---不過豆醬幾咸，調味要自加留意。