財散人安樂！

錢非萬能，但係冇錢就萬萬不能！

十年前曾經做過「骨質密度檢查」，結果超靚；去年開始見腰骨痛，趁睇開醫生，問佢我會唔會係骨質疏鬆？醫生答：「你腰痛唔會關骨質疏鬆事，骨質疏鬆無徵兆，祇係跌親就好容易骨折啫！」

如是者，睇左成年中醫，做埋針灸，直至今年年初，見骨痛情況好過最初，但係又唔係完全冇事，決定唔睇啦-----日日早晚食中藥，食到人都癲！

今年五月，無情情發生罕有意外，跌到「灘灘腰」，照X光證實脊椎有部份彎左，有一折骨又扁左。做物理治療一直做到依家---其實新跌嘅痛楚好番晒架啦！祇不過去年嘅腰患又返嚟探我，我見反正都做開物理治療，希望做番好佢啦！

做左廿次，物理治療師問我份保險包唔包做「磁力共震」？佢話做左就可以確定我嘅問題、唔駛佢估估吓。我答：「我份保險祇包我睇門診(物理治療、祇要有醫生轉介，都算係門診)，應該唔包做磁力共震喎！」

早三個星期上伴奏班，隔離位同學同我講：「我地同病相憐呀！(老師叫親我參加「師父仔局」我都答我腰骨痛，唔坐得四個小時---請佢食檸檬！所以全班同學都知我呢個問題---唉！邊度有私隱可言吖)我又腰骨，保險可以做磁力共震，但係結果話我冇得醫，因為係骨裂，祇能等佢自己生番埋。」

心諗：既然佢份保險都包做磁力共震，咁問問又何妨呢？

問左保險公司，佢地話祇要醫生認為我有此需要，待審批後便可往指定診所做。

「磁力共震」結果確定左物理治療師嘅估計冇錯！物理治療師告知「骨退化」治療需時，所以我由最初每星期做三次、改為依家一星期做一次物理治療，加埋每晚做一些佢建議嘅拉筋動作，今個星期好似好左啲喎！

「磁力共震」報告其中有一點是懷疑我骨質疏鬆。其實事隔咁多年，我都想做「骨質密度檢查」，但每次致電有關機構，佢地都答我要西醫轉介，所以一直未有做。

呢輪跌開有頭有路，前日又無情情因為追賊響二樓撲落街---如果真係撲落個賊度佢肯定扁左！可惜吖，撲佢唔中！原來係我發夢捉賊(我自小立志當差，除暴安良架)，結果響張床度撲左落地下......無嘢墊住早唔跌、遲唔跌！幾日後仲要出「騷」添！打電話俾化妝小姐，叫佢帶定啲特技化妝品，隨時用得著；再唔啱，化個大戲妝，咁就咩嘢都遮晒！

反正前日睇開醫生，我叫佢寫埋紙我做「骨質疏鬆檢查」。醫生答：「保險一定唔包喎！」

我：「我自己俾錢都唔得？」

醫生：「咁就得！」於是咪行過幾條街做埋檢查囉。

今早去醫生處睇報告。醫生都覺得奇怪：「咦！你份報告好正喎，以你呢個年紀，密度響綠色範圍以上。」分三色：綠色係最正常、其次黃色係有少少疏鬆、然後是紅色，真正係骨質疏鬆！

十年前做嘅檢查，祇係檢查大脾。所以我一向以為人嘅骨質係全身一樣嘅！今次做兩處位置，當時我經已多口問：「何解要檢查兩個位置？唔係全身骨骼一樣嘅咩？」

職員：「依家做得細緻左，可以續個位置檢查。你檢查呢兩個部位係一般嚟講會係全身較差嘅位置。」

連最差嘅位置都冇問題，咁就真係「正」咯----所以成日跌都唔散囉！

我問醫生：「呢種檢查，係咪五年做一次架！」

醫生：「原則上係，不過以你嘅情況，我估計五年後你最差都係緊緊去到黃色果度，除非期間你長期服用某些藥物而引致骨質有影響，否則可以講係好安全嘅。」

今次財散人安樂之外(唔駛再擔心有咩嘢問題)，仲排除左我心裡面一個疑問：自問我飲食均衡，冇理由會骨質疏鬆喎！(如果唔係「磁力共震」報告質疑，我從來冇懷疑過)

自小(我指我兩位阿哥未結婚，一家同住果陣)我阿媽經常煲牛骨湯飲、我做果幾廿年工好飲好食(祇驚營養過剩嘅啫)、依家做一家之煮，更加注重飲食！

以前未退休，每晚睡前都諗吓今日遇過咩嘢人、做過咩嘢事、明日首要處理嘅係咩嘢？諗完便安心睡覺。退休後，除左諗同與唱歌有關嘅嘢之外，睡前必定諗定明天煮咩嘢餸、屋企有啲咩嘢、仲要買啲咩嘢？邊啲嘢要響超市買、邊啲一定要去街市買？諗完先至瞓。咁多無謂嘢諗，點會得閒吖！

當然，買咩嘢餸原則上可以去到街市先諗；我早一晚諗係因為我要度吓：前日食過咩嘢、尋日又食過咩嘢？避免重複啫！基本上我份人唔偏食，每餐必有菜加一種肉類：雞、魚、牛、豬、羊；如果果日煲老火湯，餸便較清淡同份量少啲！