干戈、煢煢

早兩日講過「參商」一詞，今日講嘅係「干戈」同「煢煢」兩詞。

除左讀書時期，唱粵曲最早接觸「干戈」一詞咪係「鳳閣恩仇未了情」、平喉果句「又恐怕干戈撩亂為紅顏」囉！其實此詞響粵曲唱詞裡面，亦好常出現---一些講戰爭橋段嘅曲都有用到！

至於佢嘅讀音，係「杆歌」。但係好奇怪，我經常都聽人讀左「杆窩」---包括我位學生！十年前被譽為加拿大國歌嘅「刧後描容」(因為當年響加拿大嘅粵曲友無人不識、無人不學)，其中子喉有一段「三叠愁」小曲，一開始果句係「干戈撩亂」；此曲我教學生唱時，雖然我一再指出佢唱錯呢個音，佢唱左好幾次都改唔倒，係都要唱「杆窩」，原來錯左嘅嘢，你唔刻意、唔用心去改，係好難改嘅。

早輪聽「戲曲之夜」播「雙仙拜月亭之搶傘」，我覺得幾好聽，於是約左曲友芳芳下個月操。芳芳早兩年老師教緊呢首歌嘅時候，經已問我要唔要曲詞？我答：「太多歌要學啦！學唔切，唔好俾我啦！」哈！今次衰衰咁問佢要曲詞、同約埋佢操曲。佢份曲詞同街版出入都幾大，所以北上操佢呢個版本嘅曲，一係自備曲詞，一係叫曲社去另一間有呢份曲詞嘅曲社借(佢有些同學去梗某些曲社，放埋私家曲詞響度)。

過埋三十號個「騷」有十日時間學唱呢首歌，首先梗係要去「戲曲天地」節目重溫搵番首曲嚟聽啦！雖然首曲同我份曲詞有些出入，都好過冇吖！

熟悉「雙仙拜月亭」故事嘅都知，「搶傘」呢段係講男女主角在逃難時相遇的一段情節。其中有句曲詞，除左平喉有句滾花「不過際此撩亂干戈....」外，子喉亦有句滾花：「慘矣煢煢弱女....」。聽演唱者是唱「螢螢弱女」音，實際上，「煢」字應讀「鯨」音。遇到唔識嘅字，好多人都選擇有字讀字、無字讀邊，今次可能係個「煢」字與個「螢」字相似掛！

以前時興唱歐西流行嘅時候，有個「聽歌學英語」節目；其實學粵曲都可以識好多字架----重點係你有冇心去學啫！