愛。回家

每晚黃金時段播放嘅「愛。回家」，不經不覺都做左幾百集。我上海位姪女每次回港，都問我有冇睇？我答：「冇其他嘢睇咪睇囉！好睇咩？」

姪女：「幾好吖！得閒就睇，唔得閒唔睇又冇損失！」

咁即係咩嘢？係好、定唔好？

好嘅，可能呢套小品可以俾啲半紅不黑嘅藝員多啲時間磨練吓演技、又或者用呢套小品嚟安置一些又要俾工作佢做、又唔知佢地可以做咩嘢嘅新人囉！

睇呢套劇---馬壯個角色不知所謂，貪小便宜、吊兒郎當、冇責任感(佢唔細架啦)，即使俾佢考埋個律師牌都冇用；咁嘅性格，邊個敢委以重任？安排佢同德如一對，無論外型(似姊弟)、性格、責任感均南轅北轍，大纜都扯唔埋。

拉姑果個角色，除左早前我響網誌講據聞佢為左幫朋友(抑或係幫自己)鋪頭賣廣告，集集都圍住不同款式嘅披肩(可能後來知道有問題，近期少左)之外；我唔知佢響套劇度有多大年紀，即使佢係馬虎最細果個細妹(當馬子妮得廿三歲，馬虎點都有六十五歲)，當佢較馬虎細廿年，點計佢都應該有45歲掛，但係成日響度扮細、扮萬人迷，真係有點嘔心！之前安排佢同涼粉一對，又係似姊弟，依家同阿域順眼好多。

好在依家果位馬子妮離開左套劇----佢響律師樓做文職，成日著熱褲、超短迷你裙，律師樓形象都俾佢破壞埋。

上官飛，全不長進！淨係識玩音樂。玩音樂都唔係問題，真係有天份嘅咪響果方面發展囉，可惜佢個人懶到出骨！佢成日唔知自己想做咩？淨係識得想住果個木口木面嘅思思。   

樓尚友係一個對自己好有要求嘅人，偏偏對女朋友全無要求！做佢果位女友嘅Wａｌ ｔｅｒ，表現係一名白痴妹---係劇本問題、抑或係佢嘅演技問題呢？

相對起來，「沒女大翻身」娛樂性豐富得多----雖然我頂晒籠睇左四集！真係台台都冇嘢睇，又要等時間睇第二啲嘢果陣，咪焗住睇囉！

點好娛樂性？最好睇唔係班沒女，係佢地班教練---一位由頭到腳兼且開埋聲，你都以為佢係男人果位，原來係女人嚟！另一位扭扭擰擰行Catwalk，你以為佢係女人，原來係男人！化妝師成個我小時候見人地玩果啲塑膠洋娃娃，成個膠樣；另一位惡死到似巫婆，講廣東話又有懶音，真係十足十「愛登士家庭」成員(註)咁。

至於果七位沒女，第一果位整完唔覺得佢順眼左，個口大到要用線縫埋佢；最尾果位其實本身個樣吾難睇(其實有好幾位，除左肥之外，一點不難看)，但係俾班人攪到成個花街神女咁(雖然廟街同果欄祇係一街之隔啫)，我係佢個女、打死都唔會認番佢！

傍白問佢個仔：「媽咪靚唔靚？」個仔有點勉強咁答：「....靚！」

問：「咁佢以後變成咁好唔好？」仔：「唔好囉掛！」咁你認為佢認唔認同阿媽外表嘅轉變吖？

基本上大部份沒女都係肥人，所以咪全部要幫趁果班.所謂醫生食佢講嘅營養食品、所謂拔罐師嘅去水治療、幫趁牙醫做牙貼(甚至換埋棚牙)、跟住化個濃裝、著件靚衫便說甚麼大翻身！

你淨係睇吓欣宜，便知道要響半年內減倒幾十磅嘅，要keep住個身形，少啲恆心、少啲錢都唔掂！依家美容院做宣傳，便免費幫你做啫，第日何以為計？

其實佢地嘅問題，祇要肯問吓身邊嘅朋友俾意見，都可以解決倒！唔駛攪到自己唔知似咩？

註：

愛登士家庭意思是指某個家庭的人,行為古古怪怪,莫明奇炒.

愛登士家庭其實是一套很久很久以前,大約70年代的一套外國電視劇,後來重拍過卡通及電影.