「無線」又試天馬行空

2014/09/08 11:02:57 網誌分類: 影視
08 Sep

剛播完嘅「載得有情人」,個人覺得算係近期佳作---啲演員個樣睇得順眼,冇整呢樣、整果樣;兼且賣溫情,算係啱班C奶睇。不過,劇中鍾景輝果個角色太過離譜,為左跣商業對手,連自己女兒嘅終身幸福都可以出賣!佢最終嘅報應係患左腦退化症:呢啲點算係報應呢?佢都唔記得自己做過咩嘢、更加唔會追悔!

呢套劇亦講出左另一個現實---女尊男卑(女老板同男司機)係唔得嘅!男女主角最終可以走埋一齊(果個結局亦有點牽強---真係可以咁啱?兩個在唔同地方生活嘅人,可以響同一日、同一時間相遇),係因為男主角終於搵倒錢,成為三間Cafe嘅老板啫!

依家播緊套「使徒行者」,雖然我一向鍾意睇警匪片,但係呢套劇第一集經已令人匪夷所思----幾十人拎住手槍、鐵尺、西瓜刀圍住困響車入面嘅林峯同佘詩曼,都傷佢地唔倒!

雖然我未做過卧底,但係做卧底都應該有佢地嘅守則,佢地要用錢(當然係同工作有關架啦)亦要獲得警務處同意。你睇吓佘詩曼個角色---佢嘅卧底工作祇係負責收風,但係動不動可以出公數食鮑參剌肚(佢同上司攞錢),工作時間自由,一邊收公務員糧、一邊同自己間足浴鋪搵錢,咁都得?

可能我俾以前睇果啲講卧底嘅戲誤導左---卧底首要係唔可以以身試法(註),唔可以殺人放火,但係依家套劇,卧底可以吸毒、劈友、開外圍....嘩!我都寧願做卧底,唔做差人咯!正職收入以外、仲可以有大把錢駛!

我相信無線自己都知,啲編劇響度大話西遊!不過,佢地更加清楚啲觀眾仲衰(我講緊自己咋),總係一邊鬧、一邊睇;好似套「沒女大翻身」咁,我都話睇得果四集啫,原來好多朋友集集睇,雖然大家嘅感覺相同---果班導師真係人間極品!

因此,無線冇有怕!話之你鬧,最怕你唔睇啫!

註:

 典故: 身:親身,親自;試:嘗試。試著親身去做觸犯法律的事。指明知故犯。

回應 (1)
我要發表
2014/09/09 14:06:49 回覆

我完全無睇,睇大陸台,中國開放之路,睇落有共鳴,雖然明知唔會很真實,一定有所隱暪!習當年是幹部。

user