避得幾多

「地溝油」事件鬧到滿城風雨，人人自危。上星期報章刊登了數百間疑有用了「地溝油」食肆名單，呢兩日又陸續有榜上有名的食肆登報聲明，澄清絕冇其事

不過，你有你講，邊個人唔怕死----寧殺錯、冇放過！所以，如果真係俾人寃枉嘅食肆，都真係幾傷！

今日返「幼稚阮」。同學相處左半年，大家熟落左，依家下課後，得閒嘅都會一齊去附近間連鎖酒樓飲茶----人唔多，每次都係四五個。我間中有參與，佢地都知我中午唔食嘢，所以夾幾十蚊可能淨係食左個叉燒包！不過，久唔久都要參與吓嘅，八吓都好吖！

今日下課搭電梯果陣，經已有同學話左千其唔好再去「富臨」(因為係黑名單之一)，所以轉移陣地去左佢對面果間----呢間唔係連鎖酒樓，可能全港都祇係得一間！

我：「佢冇響名單度唔表示冇問題喎！你諗吓，天天新款，祇不過因為佢規模細，政府要攪都攪大果啲先啦！」

同學們：「都冇法子啦！暫時眼不見為乾淨。」做人做到咁無奈都真係幾咁無奈！

曲友走埋一堆，梗離唔開講唱曲嘅！雖然呢堂係演奏班，但基本上九成人係唱而優(？)則奏嘅。不過，以我同佢地飲左幾次茶，佢地主要都係出會堂「騷」；其中有位同學講開最近一次出「騷」，佢唱「摘纓會」，唱完觀眾拍爛手掌(我地係伴奏班同學，彼此唱歌唱成點大家都唔知)；同場有人唱左首新曲，睇住啲觀眾一個二個去洗手間。所以佢話出會堂「騷」一定要唱舊歌。

我：「呢樣嘢我同意嘅！不過，有些演唱者喜歡追新曲，通常果頭學、果頭爭住攞嚟出「騷」，從來唔會用觀眾嘅角度去考慮---結果咪：唱果個Enjoy、聽果個 Annoy囉！」

社區會堂與康文署場地，觀眾分別頗大！康文署場入場觀眾很多是唱口(有份演出者)的朋友、親友，出席有陣時係俾面派對、有時係因為大家是同學，一齊學某一首曲，所以抱住觀摩(又或者因為自己都識，所以嚟睇吓你衰邊度)；即駛唔係唱口朋友，很多均是曲友，所以即使是唱新曲，因為大家都有學，所以冇咩大問題。

社區會堂「騷」，入場觀眾多是附近居住的長者，當然他們/她們年青時亦是粵曲愛好者，但是他們/她們所熟識的都是一些舊曲；當然唔排除有些入場觀眾是為左有禮物收而來。所以響社區會堂出「騷」，遇著觀眾熟識的曲咪有共鳴，仲同你一齊唱、甚至唱得大聲過你囉！遇倒一些新曲兼且唔熟識嘅，有修養嘅咪閉目養吓神、否則同響你唱曲嘅時間上洗手間、甚至出去行吓街先----如果完場冇禮物派，可能就去如黃鶴架啦！(咁你咪影響埋下家囉)

其實何止唱曲，做任何事都要設身處地，從對方嘅出發點諗吓，這樣才是正確的處世態度。