違反自然現象

每天行落街，我都好留意附近環境有咩嘢改變？

近呢一年，我留意倒每逢月頭，都有一兩間鋪頭結業。所以中國人講果句：打工冇出頭！依家係錯架。打工雖然冇得發達，但係起碼唔似得創業做老板咁---唔成功、便成仁！唔好彩嘅、分分鐘欠落周身債添！

話又說回頭：有人辭官歸故里，自不然有人漏夜趕科場。但係，奇就奇在：摺一間鋪、跟住都係開間藥房！

紅磡某個舊屋苑，一座樓樓下便開了五間藥房！是香港人身體越來越糟，要成日幫趁藥房？非也，是香港人增加人口生產，對奶粉需求日增？又非也！

咁攪法，真係失衡啦！開甚麼鋪是根據市民需要而定，可是依家反過來是：人家要求甚麼、香港的生意人便投其所好，供應甚麼。

屋企樓下間「八方雲集」結業，今日見倒新嘅招牌又係「？？藥房」。

睇嚟，依家開藥房真係好好搵。不過，奇就奇在響弼街有間藥房(果條街經已有不少藥房)，開左前後相信唔夠半年，最近見佢經已摺埋。

今日落街遇見樓下住客？先生。佢每次見我都同我講地產經---我之前買左隔離座樓一個細單位，佢當時仲跟埋我上去睇樓，心思思想買、但結果冇買！一年後我賣左間屋仔賺左多少。依家見親佢，佢都同我講：你果間屋依家升到？多錢啦！(意思即係我蠢，賣得早囉！哼)我同佢講：如果我唔賣，間屋個個月要供錢俾銀行；當時樓市又麻麻，收租唔夠供樓！我賣左佢反而有錢落袋。抵唔抵見仁見智啦。

？先生告知附近間「雞旦仔」老細(就係最近我網誌講果間)成日講：搵埋搵埋唔夠交租！

咁又係事實。樓下原本有間大型連鎖茶餐廳，早兩年都全線結業，將啲自置鋪位放租。樓下果間租俾「卓越」個個月收廿幾萬(我講兩三年前嘅租金)，好過做茶餐廳啦----穩賺兼唔駛同伙記供強積金！

所以，做生意一定要買鋪先有得做----生意好又唔駛驚業主加租、生意唔好咪放租做收租佬/婆囉！如果租鋪創業：生意好！業主狂加租，你不過幫業主打工；生意唔好，分分鐘走佬都唔掂！