一入侯門深似海

取消收費電視合約不容易是不少市民的經驗，消委會過去三年共收到3,200宗涉及本地三間收費電視台（有線電視、now寬頻電視及無綫收費電視）的投訴；通訊事務管理局過去三年亦接獲483宗相關投訴，當中85宗關於終止合約，有線電視佔55宗。

家住荃灣的鄧先生去年夏天亦為取消有線電視合約弄致一肚氣，約滿前一個月他親身到門市申請被拒，要他回家致電熱線，但因工作不定時令他費盡心力，前後一個月才成功取消。

2009年有市民將電影《希特拉的最後十二夜》（圖）情節製成《希特拉都取消唔到有線》的短片大肆諷刺。

小市民取消合約難，女律師翁靜晶去年11月在個人facebook亦炮轟多次向有線申請終止服務不果，退還機頂盒和遙控器仍被收月費，她決定停止自動轉賬兼發律師信，事件才獲解決。

-----------------------------------------------------------------------------

其實我亦曾經親身經歷過，同有線取消合約真係慘過離婚----離婚尚有法律條文可依，同有線取消合約、用「文」嘅方法一定唔得、今次呢位仁兄用「武」一樣死得！要學我咁「文武兼備」先至得！

有線客戶主任仲要誤導人：有關終止服務事宜，客戶可以電話、傳真、郵寄、網站、或親身到各專門店及有線電視大樓辦理。

我嘅親身經歷：我搵人去有線電視大樓取「終止合約表格」(攞表格咋)，佢地要我親身去攞，唔肯俾！

打電話去熱線，如果你揀取消服務，係冇人彩你嘅！所以我接查詢(咁就有人仆倒嚟聽電話)，不過都冇用，你一樣係要親身取表格----佢一不肯郵寄俾你、二不肯電郵俾你、三網站亦冇取消合約嘅按鈕提供！

所以，要取消合約，最直接(亦係惟一辦法)係親身(記得帶埋原子筆，因為佢唔會借俾你填表格！果度幾偏僻，隔離左右都幾難借倒筆(係有都唔會借)；其實點解佢唔索性將總部設響北京，咁啲客要搭飛機先可以終止服務，咪仲好)去到佢荃灣總部，同樓下詢問處攞表格(千其唔好客氣呀！反正佢會將你當賊扮，唔會俾你見佢客戶主任，最多係俾你同佢電話通話，等佢盡最後努力留住你！如果有心取消合約嘅，攪咁大場大龍鳳，冇理由係玩玩吓啫)，唔好同佢講咁多，祇要堅持攞表格。

祇要你堅持，佢地結果死死氣都會俾張表格你。你最好帶埋可以墊住填表嘅板(佢地有可能衰到要你企響度填架)，填完佢話會幫你傳真去有關部門----記得要佢俾證明、證明有關部門經已收倒你份表格----須防人不仁！如果唔係咁、佢地之後話傳錯左地址、或者有關部門收唔倒，你都冇仇報！

所以話：係咪慘過攪離婚呢？所以呢......首先....最好就唔好同佢發生關係囉！同時，呢個機構，再見也不會是朋友！