風雨斷腸花(一)

之前講過，「風雨斷腸花」根據曲情，算是名曲「落霞孤騖」的上卷。

曲情描述：

「落霞」女士出身風塵，與「孤騖」先生相戀，於是洗盡鉛華。「孤騖」為求功名，彼此相分，惟衣錦歸還時，「落霞」女士已病入膏肓、最終死在孤騖懷裡。此曲講「孤騖」因上京赴試，兩人生離死別的情景。

我同「哎呀大仔」都吾鍾意呢首曲。第一：曲情唔好---男人上京赴試，做佢嘅女人應該鼓勵佢至啱，但啲曲詞俾人感覺係果位「落霞」係一個淨係顧住自己嘅人。如果係咁嘅，佢咪唔好俾「孤騖」上京囉！喊到仲慘過下卷，我同其他曲友傾開計，佢地不約而同話：如果佢地係「孤騖」，就一腳伸左「落霞」走喎！第二：呢首曲講「落霞」果陣有病在身，但係成首曲都好多高音(連暈低前，都仲要用高音唱)，唔合邏輯！(不過，尋日我都喉嚨痛，啲聲都有啲不受控制，原來都唱倒架，可能我地誤會左作曲果位仁兄都未定！人地首「新霸王別姬」，虞姬自刎後仲可以唱一大段曲---能人所不能！)

你唔好理，聽講呢首歌銷路冠軍(阿仔講嘅)兼且係響深圳最多人操練嘅一首曲(我地咁唔鍾意首曲都要順應民意，操番次啦)！

日期：2014年9月24日

地點：明輝

演唱者：Van仔/Van

https://app.box.com/s/s9gbrghi080g34mtv6t9