命運是對手

呢世人都冇橫財命，更加唔似得阿許？？先生咁，瞓醒覺便有人會無端端入成千萬落佢個戶口(佢話冇將政府機密資料泄露架！不勞而獲都得)---我啲錢咬出嚟有血有汗架！

哈哈！尋日竟然自摸十三么喎！有咩嘢出奇啫，我其中一位豬朋經常都咁好運架啦---不過我一世唔夠運，打左三十幾年麻雀先第一次遇倒。還以為從此轉運、可以改姓「許」添！

仲未夠，跟住一鋪清一色自摸「海底撈月」，又係呢世人第一次，仲唔係從此有運行？

豬朋提醒我快啲影番張相留念、還要影埋佢地幾個嘅泄氣樣！我問：你地真係唔介意我將你地嘅相上載？(佢地知我有寫開網誌)一個二個即時垂低頭。

我：「你地放心！我一向唔會將朋友啲相放落網誌度(除非人家同意)，不過我免得過都唔會做呢啲嘢。」

呢期「佔中」紅呀！所以尋日個個打紅中果陣都講：「我唔會佔中嘅！」

唉！打左十六圈，結果一家贏三家---我係其中一位輸家。都話好醜命生成：你點努力都冇用！不過都要盡吓人事架：冇理由咩嘢都唔做：等死架！

打完牌，如常落樓下食泰國菜----一來好食、二來好便宜、三來就腳！尋日豪食咖哩蟹，每人都仲分倒有一百蚊「水」。

跟住又一個噩耗，臨走時老板娘告知做到呢個月尾唔做，退休返泰國。此泰國餐廳響度開業廿幾年(我都搬左嚟接近廿年)、睇住佢細鋪搬大鋪，晚晚座無虛席。希望老板娘響呢區捱左大半生，可以返泰國安享晚年啦。

聽完呢個噩耗，我地幾個人企響鋪外發愁：下次竹戰完，去邊度食飯好呢？