無心寫網

我只係一個平凡嘅阿毛師奶,唔識政治亦從來唔關心,响我簡單嘅思維中,只要人人活得開心,生活平順咪皆大歡喜囉!理得佢邊個做皇帝!我估好似我咁心態嘅人都唔少架!或者有人會話咁係自私,我想請問聲,嗰d為左達到自己目的,不理他人死活嘅政棍,鼓動年輕人上前線,自己仔女就匿埋享福,損人利己嘅,唔通就唔自私?

你可以話我冇大志,眼光短窄,唔睇將來,唉!今日都唔知聽日事,而家全世界都咁多天災人禍,隨時一個意外就bye bye嘞!好似馬航單嘢,成機人仍然下落不明,係咪好化吖!

算吧喇!香港係福地嚟架!願大家珍惜!千祈唔好搞到重現64悲劇!呢個政府係傀儡嚟架咋,話唔到事架!阿爺一定唔會為左一個小小嘅香港妥恊,只怕最後學生,市民,政府都係輸家!

--------------------------------------------

昨日whatsapp傳來「佔港」各頭頭住址，呼籲市民佔佢地屋企，以其人之道還自其身！我唔知呢啲地址真確性？不過，我唔會再傳囉！理論上罪不及家人---你睇吓尋日響旺角訪問果位中三仔呀，佢父母都唔贊成佢「佔港」！有用咩？依家啲年青人，除左心口有個勇字，欠左critical thinking (獨立批判能力)，教師話咩、佢就信咩；同輩話咩、佢又信咩........一聽倒為民主(連真民主係咩嘢都唔知)，就認為係好嘢，一於衝...衝...衝...

香港人要怨嘅，怨英國人響徹出香港前開始攪果個所謂代議政制(1982)，選區議會，鋪定晒路攪到今日咁嘅局面---頭果十年區議會選出嚟果啲區議員大比數係教師同社工：無法子！佢地因工作關係，容易接觸年青人(呢啲人最容易受影響)。咁咪死囉！做教師嘅，成日要開會，咁點呀？每次開會咪搵人代課囉！你諗吓，教學質素係咪每況愈下吖！。

跟住，呢啲人為左要繼續留低做區議員(收兩份人工，淨係要請代課：除笨有精)，於是不斷同學生洗腦，你話吖，啲學生思想咪一面倒囉！

英國人又真係聽明，計啱晒時間---佢地一日留響度都保留委任制(因為佢地都知道全民選嘅、一定管唔掂)，但係當佢地徹出後，便搵果兩個賣國賊，向香港政府施壓，說什麼冇普選、冇明天....尋日英國人仲走出嚟自圓其說，解釋何解徹出前唔俾民主香港人；哈哈！如果佢地真係咁諗，當年又唔應該推出代議政制呢樣嘢啦。

唉！真係吖，話左唔講、又講...