燒嘢食 ......

2007/10/22 17:08:06 網誌分類: 嗜好
22 Oct

今日難得放假 , 就同小蛋去燒嘢食 , 其實燒烤呢樣嘢 , 我地兩個都好鍾意 , 可以話係我地嘅共同嗜好 !

今朝一早 , 我就靜靜雞走去買早餐先 , 諗住等小蛋可以瞓晏D , 而且可以順便買埋哂D燒烤嘢 , 全部攪掂等小蛋唔駛操心 , 舒舒服服咁享受呢日假期 , 點知可能關門大力咗嘅關係 , 所以小蛋都係醒咗 , 真係功虧一簣 !

十一點幾就去到西貢 , 好在都唔係太多人 , 霸到個好爐 , 最好彩嘅係上一手嗰班人無淋熄D炭 , 所以係咁意加少少炭就燒得 , 正 !

其實見到D人透爐透得好辛苦 , 都諗起以前自己都一樣係咁渣 , 我第一次透爐係完全失敗嘅 , 最卒之好在有個好好心嘅嬸嬸燒完仲讓個爐俾我地 , 不過自此之後 , 就吸納咗少少心得 , 令到燒嘢食百分百地變成一種樂趣 , 希望分享下以下心得 :

1. 唔係老手 , 就唯有用炭精 , 盡量揀D細炭圍個井形 , 炭精放井嘅中間 , 點著炭精後放一塊大而簿嘅炭喺炭精上面 , 咁等一陣就會全部著哂 !

2. 如果D炭濕 , 就會有白煙 , 所以會有可能唔著 , 咁就要撥火先得 , 最好係用紙扇或紙皮 , 用報紙就辛苦D , 如果乜都無帶 , 可以試下用口吹 , 朝火頭相反方向吹 , 係好有效嘅方法 !  

3. 以前用紙碟裝嘢食 , 喺戶外大風少少 , 隻碟就會飛落地 , 就算放咗D食物落碟 , 大風D都一樣頂唔順 , 後來改用紙碗 , 情況好些少 , 但係大風嘅話都係攪唔掂 , 同埋有烏蠅就仲慘 , 佢一飛埋嚟 , 你辛苦經營嘅食物就要報銷 , 我而家會改用午餐盒 , 一來唔係咁易吹得郁 , 二來就算吹咗落地 , 只要個蓋冚得實 , 就唔會有問題 , 烏蠅更加無影響啦 , 而且又環保 , 用完洗乾淨下次又用得 , 仲有 , 唔知大家有無食美心蘿蔔糕 , 而又有留返個盒呢 ? 用呢個盒嘅最大好處就係 ... 佢嗰四個透氣孔 , 可以用嚟插兩對筷子 , 咁就算幾大風 , 都唔會吹跌筷子啦 !

希望呢D心得會對大家有幫助 , 可以開心D享受下燒烤嘅樂趣啦 !

回應 (0)
我要發表
user