古天樂是我的酒腳，也是我很欣賞的演員，這幾年我們常在片場聚首。說到新片《單身男女2》由三角戀搞出五角關係，古仔笑言這個愛情故事如星球大戰般精采，「今次係帝國反擊戰，我以地球男身份打敗火星男！」聽唔明？那就解說一次，高圓圓三年前在《單身男女》中，情傾花心「地球男」古天樂，卻選擇嫁忠貞「火星男」吳彥祖，結局出乎意料，三年後的今天，杜琪峯、韋家輝決定讓程子欣再選一次，加入港女楊千嬅、浪子周渝民（仔仔）來延續這個愛情故事，「其實我這角色在愛情路上很迷失，對圓圓難捨難離的同時又向千嬅求婚，關係錯綜複雜。」
愛情從來不是一加一等於二，《單身男女2》更由三角玩到變五角，關係錯綜複雜，故事承接上集未完的結局，導演編劇有意讓程子欣再選一次，古仔說：「這有別以往那些續集把故事全改，是緊接上一集個尾開始演，今集多了角色，令情節更豐富，成個戲由千嬅開始牽引出來，一開始就話千嬅將我從深坑中救出，因我對圓圓仍是難捨難離，好迷失，唔知究竟係咪鍾意就向千嬅求婚，關係幾複雜。」
為拍戲學攀石
兩男爭一女，得個嬲字，續集玩到五角戀，自然鬧出不少笑話，當中包括因誤以為火星男婚前偷歡，古仔找上門狂毆對方，他說：「我們不是拍功夫片，不會招來招往，都係一推一撞一跌，然後又你一拳我一拳咁，咁杜sir要有真實感，所以一入屋就打，掃跌成屋擺設，撞爛一個人咁大的花瓶，Daniel和我都有被玻璃割傷。」
事實上，古仔為應付導演連串攀爬要求，特意跑去學攀石，「第一集話我係攀石高手，做雜誌封面，今次就正式講這個位，帶千嬅去攀石，但就算你有去學都無用，因你要去攀一棟大廈，Ending我要由底爬上一棟大廈頂係好離譜，睇景先知全玻璃，點爬？除非蜘蛛俠，後來發現其實玻璃中間好多坑位，夠攝隻腳趾入去，夠插隻手指入去就爬到，拍那場戲都真係幾攰。」蜘蛛俠搶婚一幕，冧死女，「都唔係，Ending被千嬅攞對好高的斗零踭打，然後再俾圓圓兜巴兜巴車，導演要佢哋出盡力，感覺要好狠，結果我成個心口瘀晒。」
女強人求愛
繼十二年前《乾柴烈火》後，千嬅再跟古仔合作，飾演股壇女強人的她為了愛情，甘做下靶，她說：「我、古仔和仔仔是另一條線，衍生另一個都巿戀愛故事出來，講我們點去處理現代男女關係的問題，這個女人好叻的，有錢有地位有事業，但在愛情路上選了一條唔係自己容易去走的路，點去爭取一段感情關係，到最後都可能失敗的。」
到跟仔仔合作，千嬅坦言戥對方難受，她說：「之前好多音樂演出會遇到，佢好內斂又唔講嘢，心諗死喇，要同佢談戀愛喎，點了解佢呢？但埋身先知佢好專業，會事先跟我溝通，變相大家唔會浪費時間，好有耐性去溝通，Ending那場要抱着我行，那時我又重又肥，但佢又唔會出聲的，跳海那場先辛苦，但佢又好會照顧對手，所以成件事你會見到佢好投入和專業。」
千嬅演技開竅
首次跟杜Sir合作的千嬅，開工頭一天便要跳海，之後又醉酒墮海，對不諳水性的千嬅來說，極大挑戰，「當年那部《每當變幻時》由杜琪峯做監製，今次係佢自己拍，杜Sir出名嚴格和好規矩，在演員修為上當然好多得着，知道製作上更多的事情，層次不一樣，最重要係對Drama的演繹方法和節奏有別自己那套，原來演戲表達唔一定要表情的，可能係用時間或身體語言就已可以好到咁講到那件事的程序，佢好識得話畀演員聽要點做，佢好識教戲，教未必係佢做一次，而係會改掉你的小動作，又或建議我用另一種方法去做，那是好吸收的。」我絕對明白，因我在鄭保瑞身上看到杜Sir的影子，執小動作是非常出色的。
「你要明白，拍杜Sir的戲無劇本的，有時我們拍完那場戲都會問，究竟這場戲係之前定之後發生的？有時佢會講，但有時又會突然間有好大改變，我拍Ending那天都不知Ending係點，佢係到差不多到先同你講，其實個Ending就係咁，等你無準備去做，因有時你會諗好要點做，但佢唔係要那種。」
主持：黃柏高
統籌：林永匡
協力：彭燕燕
攝影：袁東亮
服裝：HelenLee@LaneCrawford（楊千嬅）、
SergioRossi（楊千嬅）、AlexanderWangxH&M（古天樂）
髮型：Vic_Kwan@iihair&nail（楊千嬅）、DanTam@Pi4（古天樂）
化妝：LingChan@ZINGthemakeupschool（楊千嬅）、CarmenMan（古天樂）
場地提供：E-Max 黃柏高 | 
