香港唔需要烈士

無論大中小學校學府要為全球百年大計去作育英才, 訓練稱職嘅接班人! 單以香港長治久安以嚟, 講句良心話, 筆者對現任中央政府手法確實未必認同, 但對中央政府關愛香港事務而背後做出過好多支持等, 認為中國中央已經有盡父母國嘅責任! 反過嚟睇一班香港大中小學生未有經歷過歷史性時刻, 單從幾本書入面所學就任意妄為.

先一兩年, 筆者都撰文指出過: 不教而善喺良民, 一教而善喺純民; 應和而和喺順民; 意見相左為逆民, 不安於份喺亂民; 趁火打劫喺暴民! 睇睇今日大學生嘅所作所為, 雖然大部份參予佔中嘅出發點喺為香港好, 不過手法令人側目反感. 佢哋唔知自己已經從逆民漸漸成為亂民, 當再有更劇烈行動時更流於成為暴民, 唔知道後果嚴重.

筆者一直認同大學生喺未來接班人! 就因為佢哋喺接班人, 更加要抽離對與錯嘅角度去睇世局時局政局, 更加要將國際曾經出現過嘅暴亂被平息經過汲取教訓, 更加要小心處理有人動議武力對付警方藐視法庭頒令! 香港需要嘅喺全才嚟承接前輩遺留落嚟嘅基礎, 繼而發光發熱, 令國際唔能夠冇咗香港呢粒東方之珠, 而唔喺要做暴民.

香港唔需要烈士! 香港唔需要暴民! 香港需要一群有責任感能夠承擔大事嘅未來接班人, 而呢班接班人一定要高瞻遠矚EQ過人, 能夠冷靜宏觀; 能夠急才應變; 能夠定力堅忍; 能夠知道好歹; 能夠不受誘惑! 筆者相信所有大中小學生都存有赤子之心, 之不過學校學府嘅師資出現咗嚴重問題, 雖然未到誤盡蒼生, 最低限度都已經做到誤人子弟!