咸菜豬肚湯
2014/11/11 16:13:30
網誌分類:
食譜
「咸菜豬肚湯」係潮州名菜。不過,洗豬肚比較麻煩,所以甚少整!
今日做咩嘢攞苦嚟辛?有幾辛苦啫,好過瞓街吖!俾我就瞓唔著啦----隔離瞓左咩嘢人/嘢又唔知、半夜三更會唔會有人爬入嚟又唔知、會唔會突然間清場、冇鞋挽屣走又唔知.....
事緣早兩日整日式咖哩,買左樽可樂。熟悉我嘅人都知我唔飲汽水嘅,我買酒都係用嚟煮餸,唔係要嚟飲嘅。咁剩番嘅可樂要嚟做咩嘢好?洗豬肚囉---我以前都介紹過用可樂洗豬肚,睇過你唔會再飲可樂!
材料:
豬肚一個(我買新鮮嘅,肉販話同我反轉洗過,可以唔駛再洗喎!你信唔信吖?)
去殼白果一小包
白胡椒粒(20-40粒,視個人喜歡辣的程度,如有小朋友,廿粒ok)略拍碎
豬骨一舊
潮州咸菜半包浸半小時切大件
生薏米半碗洗淨(我自己加嘅,唔落冇問題)
一. 豬肚反轉(肉販幫我反左,反轉豬肚係咩嘢吖)放碗內,注入可樂醃一個小時。取出洗去污物,再下生粉略擦、再洗淨。
二. 豬肚附著很多脂肪,用利刀切走。
三. 將豬肚放滾水內飛水(如有白醋,可在水內加一兩湯匙白醋),取出洗淨切長條。豬骨飛水洗淨。
四. 胡椒碎及生薏米,我用袋裝著(如果唔食湯渣便不用)。
五. 將適量水煲滾,下全部材料煲滾,收細火煲三小時。
註:
一. 留意,每人每天不能食過量白果,頂多十粒。
二. 咸菜有咸味,基本上唔需要再放鹽;反而煲好後可以落少許糖吊味,等佢唔駛得過咸字。
三. 不能用胡椒粉代替胡椒粒。
四. 此材料份量煲完得湯約六碗。
我最喜歡喝這個湯了! +1