佔中_以大局為重1

大局, 係從整體包括世局時局政局等各方面, 從而前瞻性預防突發嘢出現時將會點樣應變, 千祈唔好等到難以收拾時至開始騰雞去想解決辦法, 到時至咁樣做, 真係後悔都嫌遲. 呢一個[為]字, 係用盡自己所能去圓融一切贊成或反對嘅聲音, 令到局勢縱然失控, 亦唔會失去民心. 只要有機會捲土重來, 支持過嘅人無理由唔再支持,

除非做咗令支持者感到心寒或認為被人利用則例外. 呢一個由[重]字喺[千里]兩個字所合組而成! 可見得責任之重, 係背負起使命去走人生路. 當中遇到崎嶇困難, 遇到荊棘泥濘; 遇到狂風暴雨; 遇到陰謀陷害; 遇到誹謗屈辱; 都係千里路中一幕幕嘅折子戲! 邊個人能夠冷靜沉默, 邊個就係最終嘅大贏家! 所贏嘅係人心, 唔係意氣.

大家食過湯麵! 大家都知道食湯麵之時, 一係拎起隻碗, 一係dup低個頭. 相信大部份都會選擇後者, 因為拎起隻碗, 可能會比熱湯淥親. 與其冒險, 不如適當之時低一低頭, 先至可以食到想食嘅麵. 麵嘅英文串法NOODLE就有點頭NOD存在. 為咗大局, 放棄所持偏見. 只要有利於圓滿件事, 低頭妥協唔會失威. 低頭妥協亦唔NO等如認同.

大局呢個大字, 係由[一人]而嚟! 而呢個一字, 並唔係從數目字層面解釋, 而係從一呢個符號去做平等嘅事! 一人, 意思其實就係人人都應該平等! 當人人做到平等之時, 人人就係大人. 所以, 呢一個大字, 會形成[大]公無私; 又會形成正[大]光明. 如果佔中所有參予者從開始到而家都能夠做到公平, 相信一早就攫取晒七百萬港人個心啦喂!