佔中_以大局為重2

有人話從政嘅人唔夠心狠手辣, 就唔配從政! 筆者就話從政嘅人唔夠持平秉公, 先至唔配從政! 孟子喺三千年前早已經提出[不忍人]呢三個字, 仲舉例講明[先王有不忍人之心], 先至[斯有不忍人之政]! 不忍人, 即係話唔忍心國民生活無依, 唔忍心國民受苦受難; 唔忍心國民受寒受凍; 唔忍心人民受饑受餓. 就係基於呢種不忍人-

呢種唔忍心嘅意識形態底下, 所有立法行政, 都以此為最終目的. 舉凡有害民擾民之處, 就會刪而不用, 甚至立適用於國民嘅新法去取代過去擾民嘅舊法! 無論中央或港特政府, 包括佔中發起人或所有參予者, 連同幕後黑手(如有嘅話), 都唔可以偏離呢個大原則. 因為國以家而立, 家以民為本. 冇民眾就唔可以成家, 冇家, 國無從立起.

去到立法最初期, 要將民生所需所急所要放在所有議題之前! 所立之法, 可唔可以適用於民? 如果可以, 又能夠適用幾耐? 如果唔可以, 有冇其他選擇以補不足? 地方官員有冇陽奉陰違, 上下其手做出擾民害民嘅事幹? 因為, 為政在人! 如果在位者不稱職, 所有推行新法將會變成擾民. 加上旁邊有人煽風點火, 矛頭就會直指中央啦!

佔中呢班大學生打住高尚口號, 點解會做出啲下作行為? 無他嘅! 單憑一腔熱誠, 加上有人慫恿, 自然冇可能經過冷靜先至做出最後決定. 就喺因為咁, 先至冇全盤計劃嚟應變, 令到成個佔中行動尾大不掉冇法收科. 可見得呢班大學生誠心有餘, 智慧不足, 於個人毫無定力, 於整體毫無統屬, 咁樣攪法, 難怪話書生造反, 三年唔成!