蒜芯炒照燒沙甸魚

以前阿媽做一家之煮，好多時都係開罐頭做餸：蛋煎午餐肉、豆豉鯪魚、粟米羮、茄汁沙甸魚....都係陪住我成長嘅！

罐頭之中，如果買果罐係地捫牌子，算係好高檔架啦！印象中地捫祇有茄汁沙甸魚，雖然好食，但係我個人唔係咁鍾意開罐頭做餸！近呢十幾年，廚師都算有創意架啦，好似用罐頭「豆豉鯪魚」炒菜，唔駛齋炒菜咁寡、又唔駛淨食「豆豉鯪魚」咁咸。所以話呢：有創意嘅，罐頭都可以上大檯！唔係講笑架，你響食肆食一碟「豆豉鯪魚炒油墨菜」幾錢一碟吖？

早幾日見周刊廣告，才發現原來依家地捫一共有三款罐頭沙甸魚：日式麵豉汁沙甸魚、茄汁沙甸魚及日式照燒汁沙甸魚，仲介紹左用蒜芯炒沙甸魚嘅食譜。我有好幾年冇食過蒜芯---一來唔係特別鐘意食、二來單炒蒜芯唔會好食，今次見倒呢個食譜，反而有興趣試吓！

唔好以為食罐頭好慘！唔平架：一罐細罐頭都成$17，蒜芯亦唔平$14一束，貴過一般菜(我通常買半斤菜，約十蚊)！

材料：

地捫日式照燒汁沙甸魚一小罐

蒜芯一束

洋蔥半個切絲

蒜頭3粒拍扁

調味：鹽1/3茶匙、酒1湯匙、胡椒粉

一. 將沙甸魚隔汁留用。魚切碎；蒜芯切段。

二. 大火爆香蒜頭、蒜芯、洋蔥，灒酒，再放入魚及照燒汁炒勻，蓋上以中慢火焗2分鐘，下鹽及胡椒粉調味即成。

註：

一. 唔想食咁多鹽嘅，可以唔落，因為我覺得照燒汁本身都好夠味。

二. 沙甸魚鈣質豐富，罐頭沙甸魚連骨都可以食埋，所以好有益。